VOV4.Sêdang - Klăng roh hâi tĭng kân Pâ Xeăng xông erêh 2021, pôa Võ Ngọc Hiệp, Vi ƀan pơkuâ tơdroăng cheăng Đảng kong pơlê – Kăn hnê ngăn Măt trâ̆n kong pơlê Lâm Đồng rơtế ƀă mâu khu râ kăn Vi ƀan Măt trâ̆n kong pơlê hiăng troh lăm pôu mâu khu pú hên, ƀok xối, jâ chĭng, ƀok tin lành tung pơlê kong kơdrâm Đà Lạt. Khu râ kăn hiăng troh lăm pôu Hngêi khôp kân – yăo phâ̆n Đà Lạt, Hngêi khôp kân a Đà Lạt, Tíu ki hriâm pro ƀok xối, jâ chĭng Khu pơtâng tơdroăng khôp Thánh Vinh Sơn, ƀă Khu teăng mâ Khu khôp Tin lành Việt Nam (peăng Hdroh tơnêi têa).

A mâu tíu troh lăm pôu, pôa Võ Ngọc Hiệp hiăng pơtroh rơkong rơkâu troh mâu ƀok xối, jâ chĭng, kuăn khôp Pâ xeăng, ƀok Tin Lành, kuăn khôp Tin Lành klăng hâi tĭng kân Pâ Xeăng xông erêh hơnăm 2021. Tơdrêng amê pói vâ mâu ƀok xối, jâ chĭng ƀă kuăn khôp pơtối veăng pêi pro mâu tơdroăng pâ nhuô̆m tơnêi têa, rơtế ƀă kuăn pơlê mơjiâng pơlê rế hía rế mơnhông tơtêk.

A Sa Ly tơplôu ƀă tơbleăng