VOV4.Sêdang - Tung khế 9/2021, Ngế xiâm, Kăn pơkuâ Vi ƀan Hdroâng mơngế hiăng ai pơkâ mơ’no 1,358 rơtal liăn tŏng kum ăm vâi krâ hdroâng kuăn ngo kơtiê ƀă sinh viên Hngêi trung Yư̆ ƀĭ đăi hok Pơlê kong kân Hồ Chí Minh tro tâ ‘na hbrâ mơdât pơreăng COVID-19. Nôkố, Ƀơrô Teăng mâ Vi ƀan hdroâng kuăn ngo a Pơlê kong kân Hồ Chí Minh dế thăm hnê mơhno mâu pơlê kân, bêng, tơring tung kơpong peăng mâ hâi lo pá Hdroh tơnêi têa tơkŭm po tŏng kum tro mơngế, tro kơlo, teăm tơdrêng tung mơhnhôk vâi krâ drêng pá puât xua pơreăng.

Xêo troh tâi khế 9, mâu kong pơlê peăng mâ hâi lo pá Hdroh tơnêi têa ai 10.864 ngế hdroâng kuăn ngo tro tâ COVID-19. Khu pơkuâ hdroâng mơngế mâu kong pơlê tung kơpong hiăng thăm mơhnhôk tŏng kum ƀă tơkŭm pêi pro hên tơdroăng rak ngăn ăm hdroâng mơngế a mâu kơpong ai pơreăng, kum tơniăn pơlê pơla tung kong pơlê. Krê kong pơlê Đồng Nai, Khu pơkuâ hdroâng mơngế kong pơlê pơkuâ, mơhnhôk châ 3 tâ̆n phái kum rơtế kong pơlê rak ngăn tơdroăng rêh ối ăm vâi krâ hdroâng kuăn ngo a kơpong tro kâng kơxái mơdât ôh tá ăm lo pa gong.

A Sa Ly tơplôu ƀă tơbleăng