VOV4.Sêdang - Măng tĭng hdrối, a Hngêi Kuô̆k hô̆i, xua tơdroăng ki pơkuâ dêi pôa Vương Đình Huệ, ngế cheăng tung tíu xiâm kal kí, Kăn xiâm hnê ngăn Kuô̆k hô̆i hiăng pơxiâm po rôh hôp má 56. Môi tung mâu tơdroăng ki kal châ tơkŭm tơpui tơno, ăm rơkong veăng tơpui tối mê cho Tối tơbleăng dêi Chin phuh ‘na hnoăng cheăng pêi pro kơdĭng, hbrâ mơdât ‘no hrê liăn ngân tê kơtê hơnăm 2020.

Tối tơbleăng séa ngăn tơdroăng pêi pro kơdĭng liăn, mơdât mơ’nhiê liăn hmâng vâ hơnăm 2020 ăm hlo: Tung pơla tơdroăng xo tơ’mot liăn ngăn kơdroh xua tơdjâk kong prâi, pơreăng tâ tú, pro tơdâng kơxô̆ liăn ngân kum rêm râ trâm pá, Khu xiâm rak liăn ngân hiăng tí tăng ‘nâi plĕng ăm Chin phuh, Ngế pro xiâm hnê ngăn Chin phuh hnê mơhno ăm mâu Khu xiâm, kơvâ cheăng, kong pơlê mơdêk tơdroăng pêi pro troăng hơlâ kơdĭng liăn mơdât mơ’nhiê liăn tê kơtê, thế kơdĭng liăng 10% tiô tơdroăng tối hdrối hrê rêm hâi; kơdroh kơxô̆ liăn ki kal, tơdrêng. Liăn ngân xiâm tơnêi têa ‘nâi kơdĭng châ dâng 55 rơpâu rơtal liăn, ƀă 5% tiô tối hdrối dêi Kuô̆k hô̆i pơcháu.

Pơkâ tro tiô luât, mơdêk hnoăng cheăng séa ngăn, lăm ngăn, tí tăng ngăn ‘na liăn ngân hrê dêi tơnêi têa; pro kơtăng pơxâu phak mâu ngế ki pro xôi luât, mâu ki mơ’nhiê liăn ngân tơnêi têa ki châ hlo ‘nâi drêng séa  ngăn, tí tăng ngăn, riân ngăn liăn.

Pôa Vương Đình Huệ , Kăn xiâm hnê ngăn Kuô̆k hô̆i tơpui hnê mơhno

Laga, ing tơdroăng séa ngăn, tí tăng ngăn, riân liăn ƀă séa ngăn liăn ƀă tí tăng séa ngăn nhên kơxô̆ liăn hrê dêi Hngêi ‘măn rak liăn Tơnêi têa châ ‘nâi ‘na tơdroăng rak ngăn, xúa liăn ngân tơnêi têa hâi tro tơdroăng ăm phêp, tơdroăng pơkâ, tơdroăng pơkâ a mâu kơ koan, tíu pêi cheăng. Tơpui  a hneăng hôp, jâ Lê Thị Nga, Ngế pơkuâ Vi ƀan ngăn ‘na luât dêi Kuô̆k hô̆i tối tiah kố, kal thế tơleăng pơxâu phâk kơtăng mâu khu râ, kơvâ cheăng kong pơlê  pơkâ tơdroăng pêi pro kơdĭng liăn. Malối, pơxâu phak kơtăng mâu ngế ki mơ’nhiê mâu tơmeăm khoăng, tơnêi, kong, têa.

Pakĭng mê, hên tơdroăng ôh tá tro tung tơdroăng tơbleăng tơdrăng ‘na tê rôe tơmeăm khoăng tơnêi têa.

“Ngin tối tiah kố, xiâm dêi mâu tơdroăng ôh tá tro tung rôe tơmeăm, xúa tơmeăm tơnêi têa cho xua tung rak ngăn, pơkuâ hâi séa ngăn tâi tâng mâu tơdroăng ki hlo ôh tá tro. Tung tơdroăng tơbleăng mơjiâng tơmeăm khoăng, thế pơtê mơjiâng, tơbleăng tơ’noăng yă rôe tơmeăm khoăng tơnêi têa, mâu kăn ƀô̆ hâi hlê tro tŭm ‘na hnoănng cheăng pêi mâu pơkâ ‘na tơdroăng tơbleăng, tơdrăng ƀă tro hnoăng cheăng.

Tơdroăng cheăng séa ngăn, hâi châ ngăn đi đo, hâi hlo tơ-ƀrê. Ki tơmâng ƀă ki hlê plĕng tung pơlê pơla ‘na hnoăng thế châ ‘nâi tŭm tơdroăng hâi hlo, ối pá.

Pôa Bù Văn Cường, Ngế pơkuâ Ƀơrô Kuô̆k hô̆i tối tiah kố kal thế pơtối châ mơdêk hnê tối mơdêk ki tơ-brê vâ hlê plĕng dêi mâu ngế đảng viên ‘na pêi pro tơdroăng kơdĭng liăn mơdât mơ’nhiê liăn a tâi tâng mâu kơ koan; pơtối hnê mơhno séa ngăn pêi pro, mơhno mâu tơdroăng pêi nhên khât:

“Kal thế mơdêk séa ngăn, tí tăng ngăn tơdroăng kơdĭng liăn, mơdât mơ’nhiê liăn dêi tơrêm kong pơlê, mơhno ăm hlo mâu tơdroăng pêi ki ôh tá tro, ing mê pơkâ troăng hơlâ tơkâ luâ xơpá. Kal thế pơkâ tơdrêng hlối luât pơxâu phak mâu ngế pro xôi ‘na tơdroăng mê, malối cho hnoăng pêi pro dêi mâu ngế ki pơkuâ xuân môi tiah khĕn kơdeăn ƀă tá tơdroăng cheăng kăn ƀô̆ tơdjâk troh tơdroăng kơdĭng liăn, mơdât mơ’nhiê liăn mê nếo kâi pro pơ’lêh tơdroăng”.

Pêi pro tro troăng hơlâ kơdĭng liăn, mơdât mơ’nhiê liăn cho troăng hơlâ ki kân tung pơla tơnêi têa ối kơtiê. Pôa Vương Đình Huệ, Kăn xiâm hnê ngăn Kuô̆k hô̆i  tối nhên, ki lŭp xua mơ’nhiê liăn xuân môi tiah kâ kơluâ há, thăm nếo ối hên tâ. Tung tơdroăng tối tơbleăng dêi Chin phuh ƀă tơdroăng tối tơbleăng séa ngăn dêi Vi ƀan pơkuâ cheăng Kuô̆k hô̆i, hên tơdroăng ối tối tơchoâm, hâi tối nhên khât ki lâi ôh, ối mơhno ăm tâng ăm hlo ƀă mâ tê, hâi pêi pro khât, ối xâu, ối ví.

Pôa Vương Đình Huệ, Kăn xiâm hnê ngăn Kuô̆k hô̆i thế, tơbleăng dêi Chin phuh ƀă tơbleăng tơdroăng séa ngăn ‘na ki pêi pro kơdĭng liăn ƀă mơdât mơ’nhiê liăn thế pêi pro tro a tơdroăng ki pơkâ kơdĭng liăn mơdât mơ’nhiê liăn ngân thế tơmâng pêi pro tro a tơdroăng ki pơkâ thế kơdĭng liăn pôi tá mơ’nhiê liăn hmâng vâ hơnăm 2020, malối tung mâu tơdroăng: Liăn ngân, liăn hngêi rak liăn, liăn ki ăm mung, tơmeăm khoăng tung tơnêi, hyôh kong prâi ƀă ‘na tơdroăng thế ‘nâi kơdĭng hâi chôu, mơdêk hnoăng pêi cheăng ƀă hên ki ê.

Pơxâu phâk khu mơdró ki lâi lot, pêi cheăng ôh tá rơhéa, Hngêi rak liăn ki pêi cheăng ôh tá hlo kâi tơ-ƀrê. Tung tơdroăng cheăng thế tơmâng ‘na mâu tơdroăng ki ối pá tung pơkâ, ‘no liăn cheăng, ‘no liăn cheăng dêi khu mơdró, pêi pro tơdroăng kơdĭng liăn tung kuăn pơlê:

“Tơplâ mơdât kâ kơluâ cho tơdroăng thế pêi pro la rơtế ƀă tơdroăng thế ‘nâi  kơdĭng liăn ƀă mơdât mơ’nhiê liăn tê kơtê. Mâu tơdroăng ki tro lŭp mê hâi tối troh ki tơdjâk hâi khế hơnăm pêi cheăng. Mâu kăn thế tối ăm ‘nâi mâu tơdroăng cheăng ki pin pêi hiăng châ tơ-ƀrê tung chêh ‘măn, tơkŭm ngăn nếo vâ kơdroh mơngế cheăng ton hơnăm, malối cho mâu kong pơlê, tơring ki hiăng pêi pro tro. Hên kong pơlê nôkố kơxô̆ liăn ki ‘no rêm hâi, rêm khế bú ‘no liăn tơdế tê vâ mơjiâng pro tơmeăm khoăng.

Mâu khu xiâm, kơvâ cheăng pêi tro tro lơ tơdroăng tơdjâk troh ‘na kơdroh mâu tơdroăng pro hlá mơ-éa séa ngăn dêi kơvâ cheăng, mê pin thế chêh ‘mot tung tơdroăng tối tơbleăng mê, séa ngăn a Luât kơdĭng liăn, mơdât mơ’nhiê liăn hmâng vâ, pêi pro tro tiô Pơkâ 166 hâi lơ 23/11/2020‘’.

VOV 1

Gương tơplôu ƀă tơbleăng