VOV4.Sêdang - A kơxê lơ 27/4, ing pơkuâ dêi pôa Vương Đình Huệ, Kăn cheăng tung Kuô̆k hô̆i hiăng têk kŏng môi tuăn tơbleăng ăm pêi pro pơkâ dêi Chin phuh, ăm phêp xúa 12,1 rơpâu rơtal liăn kơdĭng mơ’no dêi hngêi arak liăn tơnêi têa vâ rôe vaccine hbrâ mơdât pơreăng COVID 19.  Tơdroăng xúa kơxô̆ liăn kố vâ rôe vaccine hbrâ mơdât COVID 19 cho kal ƀă thâ, tơniăn pêi pro troăng hơlâ kum rêh ối pơlê pơla tiô pơkâ a Luât liăn ngân tơnêi têa.

Chin phuh hiăng xêo mâu kơxô̆ liăn mơ’no tơdâng tơ’mô ƀă ai xiâm kối. Laga, Vi ƀan pơkuâ Kuô̆k hô̆i xuân pơchân tŏng kum ăm mâu kong pơlê pá puât tung mơ’no liăn tơdâng tơ’mô ƀă tơdroăng ki rôe ƀă xúa vaccine. Xông tơpui mơgêi roh hôp má 55, pôa Vương Đình Huệ, Kăn xiâm hnê ngăn Kuô̆k hô̆i pơkâ thế mâu kơ koan hbrâ nhên mâu tơbleăng a hneăng hôp má môi, Kuô̆k hô̆i hneăng má 15.

Tiô tối hdrối Hneăng hôp má môi, Kuô̆k hô̆i hneăng 15 pêi cheăng tung 11 hâi; pơxiâm po a hâi lơ 20/7 ƀă mơgêi a hâi lơ 3/8. A hneăng hôp kố, Kuô̆k hô̆i kô mơdoh chôu séa ngăn, pơkâ ‘na  tơdroăng rah xo mơngế pêi cheăng.

A Sa Ly tơplôu ƀă tơbleăng