VOV4.Sêdang - Tung rôh hôp má 2 dêi Vi ƀan pơkuâ Kuô̆k hô̆i, Vi ƀan pơkuâ Kuô̆k hô̆i séa ngăn tơdroăng ki pâ thế séa ngăn dêi Hô̆i đong Hdroâng kuăn ngo ‘na tơdroăng klâ xoăng peăng kong ngo, kơpong a ‘ngêi tung rak ngăn Tơnêi têa nôkố.Pôa Hầu A Lềnh, kăn pơkuâ Vi ƀan Hdroâng kuăn ngo ăm ‘nâi: Drêng Kuô̆k hô̆i pơkâ tơdroăng 88 kĭ tơdroăng tơkêa tâi tâng mơnhông mơdêk cheăng kâ rêh ối pơlê pơla kơpong hdroâng kuăn ngo ƀă peăng kong ngo hneăng hơnăm 2021 -2030, Ngế pro xiâm hnê ngăn Chin phuh hiăng pơkâ tơdroăng kơxô̆ 33 ‘na tơdroăng pơkâ klâ xoăng kơpong hdroâng kuăn ngo ƀă peăng kong ngo tiô tơdroăng mơnhông hneăng hơnăm 2021 – 2025, tung mê pơkâ, mâu cheăm ối tung kơpong peăng kong ngo ƀă kơpong a ‘ngêi pơrá ối tung inâi Khu xiâm tơdroăng pơkâ, la ‘na luât tá hâi ai tơdroăng pơkâ hơ’lêh teăng.

Vi ƀan hdroâng kuăn ngo pơkâ thế Vi ƀan pơkuâ Kuô̆k hô̆i pơcháu ămHô̆i đong hdroâng kuăn ngo, Vi ƀan hdroâng kuăn ngo ƀă mâu khu xiâm,kơvâ cheăng ki ai tơdjâk séa ngăn ‘na luât, mơnhên tối tơdroăng ki klâ xoăng peăng kong ngo, kơpong a ‘ngêi nhên tâ vâ ‘mot tơ’nôm tung tơdroăng ki klâ xoăng mâu cheăm tiô tơdroăng mơnhông mơdêk.

Katarina Nga tơplôu ƀă tơbleăng