VOV4.Xơ Đăng - A hneăng hôp má 6 rôh hôp má 1 mơ’nui măng tĭng kố nah, Vi ƀan pơkuâ Kuô̆k hô̆i hiăng ăm rơkong tơpui tối ‘na tơdroăng ki ăm phêp pêi pro mâu troăng hơlâ pơkâ tung kơvâ ngăn pơkeăng vâ kum hnoăng cheăng hbrâ mơdât pơreăng COVID-19. Sap ing 4 khu tơdroăng ki kân ‘na hbrâ mơdât pơreăng COVID-19 xua Khu xiâm ngăn pơkeăng ƀă khăm pơlât mơ’no, Vi ƀan pơkuâ Kuô̆k hô̆i pơkâ thế mơnhên tối tŭm ki tơdjâk, rak tơniăn tơtro, malối cho tơdroăng ki ăm phêp mâu ngế veăng hbrâ mơdât pơreăng ƀă liăn ngân tơnêi têa lơ Khu râng liăn ƀaoh hiâm khăm pơlât mơdrếo ăm kơxô̆ liăn khăm, pơlât.

Pôa Nguyễn Thanh Long, Ngế xiâm ngăn pơkeăng pơlât pơkâ thế, Vi ƀan pơkuâ Kuô̆k hô̆i ăm phêp Khu xiâm ngăn pơkeăng pơlât, mâu khu xiâm, kơvâ cheăng ƀă mâu kong pơlê tăng, xúa mâu ngế pêi cheăng hbrâ mơdât pơreăng Covid-19 la ôh tá  xê tơdroăng cheăng ki ai hriâm hiăng chêh a chứng chih  lơ tơdroăng cheăng ki ôh tá chêh a chưng chih cheăng pêi. Thế ăm phêp khăm pơlât ing hơngế ƀă mâu ngế ki tâ Covid-19 lơ mâu ngế ki ôh tá châ lăm khăm pơlat a hngêi pơkeăng, vâ pơlât Covid-19. Paking mê, pâ thế ăm phêp ngế xiâm ngăn pơkeăng pơlât séa ngăn, pơkâ xúa pơkeăng ki hiăng ăm phêp rôe ing kong ê ăm xúa ‘na tơdroăng  ki ê vâ pro pơkeăng hbrâ, mơdât pơlât Covid-19.

Vi ƀan pơkuâ Kuô̆k hô̆i pâ thế, mâu luât pơkâ ki nếo kal thế séa ngăn tối tŭm tâi tâng mâu tơdroăng tơdjâk, tơniăn pêi pro, malối tơdroăng ăm phêp mâu ngế veăng tung hbrâ mơdât pơreăng mơnhâu ó troh ivá kuăn mơngê. Pôa Trần Quang  Phương, Kăn xiâm phŏ hnê ngăn Kuô̆k hô̆i pâ thế:

Băng 1: “ Mơnhâu ó khât, môi tiah lâi cho ó khât? môi tiah lâi ôh tá ó? thế tơchê̆ng tơmiêt nhên. Má péa, mơngế veăng pâk vaccine, khăm ngăn, rak ngăn ivá pơlât. Phá ƀă tơdroăng cheăng ki hriâm ki pêi ăm hiăng hlo nhên, la kơdroh vâ ai luât pơkâ rak ngăn, séa ngăn mâu ngế ki mê. Ví tơdroăng xúa tơdroăng drêng hâi teăm troh  a kơlo ki ó lơ ôh tá mơnhâu ó tung tơkŭm pêi’’.

Khu xiâm ngăn pơkeăng pơlât xuân pâ thế pơtối pêi tơdroăng riên ngăn nhên kơxô̆ liăn tiô pơkâ a Pơkâ kơxô̆ 268 dêi Vi ƀan pơkuâ Kuô̆k Hô̆i, la ăm phêp tơ’nôm pơkâ mâu ngế ki châ xo rah klâ kơxô̆ liăn mê liăn ngân kô ăm tâi tâng; pakĭng mê ăm phêp  chin phuh pơkâ tơdroăng xúa liăn ing liăn ‘măn kơdĭng dêi Liăn baoh hiêm khăm pơlât vâ rơtế ƀă kơxô̆ liăn ngân tơnêi têa ăm tơdroăng pơkâ khăm pơlât,  pơlât Covid-19. Tối nhên tơdroăng ‘na liăn hnoăng, liăn khế ƀă mâu ngế cheăng plâ mơdât pơreăng. Pôa Võ Thành Hưng, Ngế xiâm ngăn liăn ngân ăm ‘nâi tơ’nôm:

Băng 2: ‘’ Tung pơkâ dêi Chin phuh nôkố, tâi tâng mâu ngế veăng plâ mơdât pơreăng xuân châ tŏng kum. Krê ‘na kơvâ khăm pơlât ki tơdjâk troh luât pơkâ ăm liăn dêi tíu pêi cheăng. Pơtih, tíu pêi cheăng dé pro tơniăn 100% kơxô̆ liăn hrê rêm hâi mê mâu tíu pêi cheăng mê thế tơniăn ‘na liăn khế ăm mâu ngế pêi cheăng. Laga, drêng veăng plâ mơdât pơreăng liăn ngân tơnêi têa kô ai tŭm liăn ki vâ ăm mâu ngế ki mê. Môi tuăn tơ’nôm  tung hmâ rơnáu tơmeăm xuá tung khăm pơlât vâ tơniăn ‘na yă”.

Môi tuăn ƀă Khu xiâm ngăn pơkeăng pơlât ‘na troăng rơhlâ ăm liăn tiô Pơkâ 268, la ai kơxô# Chin phuh pơkâ vâ liăn baoh hiêm khăm pơlât ăm. Pôa Phạm Lương Sơn, Ngế xiâm pơkuâ ngăn Baoh hiêm khăm pơlât tối tiah kố:

Băng 3: ‘’Tâi tâng mâu kơxô̆ liăn khăm pơlât  cho pá ai ivá vâ ăm  dêi Liăn ‘măn kơdĭng baoh hiêm khăm pơlât ki má môi. Má péa, mâu pơkeăng ki kơnâ bú xúa pơlat Covid. Má pái, tâi tâng kơxô̆ liăn xoăng pơlât. Xua ngế ki châi tamo ing mot pơlât ta troh tối hiăng prêi ngăn cho gá pơlât Covid tâng thế koi pơlât a hngêi pơkeăng  mê kơxô̆ liăn koi pơlât a xoang cho pơlât a hngêi pơkeăng. Mâu tơdroăng khăm ngăn môi tiah hiâm ƀă kơmăi, ép mô… Klâ thế kal ai hâi khế. Ngin môi tuăn troăng rơhlâ pơkâ ăm liăn tiô tơdroăng kơxô̆ 268’’.

A rôh hôp, pôa Vương Đình Huệ, Kăn xiâm hnê ngăn Kuô̆k hô̆i pơkâ thế tối nhên liăn ngân tơnêi têa ƀă Liăn baoh hiêm khăm pơlât ăm liăn ki pơlât:

Băng 4: ‘’ Bao hiêm nâp vâ xúa, ‘na liăn ngân ki hrê ăm ngế ki lâi cho pơkâ dêi tơnêi têa. Xua mê tung pơkâ kố a môi tuăn ôh tá pơcháu ăm chinh phuh hnoăng ki pro tơtro pơla Liăn ngân ƀă Kơxô̆ liăn baoh hiêm.Pơkâ mê ai pơkâ tơdrăng ki lâi hrê ƀă liăn ngân, ki lâi hrê ƀă liăn ‘măn kơdĭng dêi baoh hiêm khăm pơlât. Tâng ngế ki lâi ôh tá chiâng klâ   mê hrê ƀăng liăn ngân ăm nhên khât’’.

Vi ƀan pơkuâ Kuô̆k hoi pơkâ thế Khu xiâm ngăn pơkeăng pơlât  pơtối chêh klêi hồ sơ vâ tơbleăng ăm Khu xiâm Kal kí hnê tối.  Pakĭng mê pơtối xéa ngăn  hlá mơ-éa chêh Pơkâ ‘nung ‘nâi, pơchuât tơ’lêi hlê, malối cho mâu tơdroăng cheăng ‘na khăm pơlât, vâ rĕng pêi pro tiô mâu luât pơkâ tung khăm pơlât vâ hbrâ mơdât pơreăng Covid-19 nôkố./.

Lại Thị Hoa chêh

Gương tơplôu tơbleăng