VOV4.Sedang - Tơpui tơno tung Tơbleăng dêi Chin phuh ‘na tơdroăng pêi pro kơdĭng, hbrâ mơdât mơ’nhê tê kơtê tung hơnăm 2020 a roh pêi cheăng kơxê lơ 27/5, mâu rơkong tơpui tung Vi ƀan pơkuâ Kuô̆k hô̆i mơnhên tơdroăng ki mơ-eăm ƀă mâu tơdroăng châ tơƀrê tung hơnăm 2020, ki má lối tung pơla kong prâi pro ôh tá tơniăn, pơreăng. Mơhé ti mê, hên tơdroăng 'na pêi pro kơdĭng, hbrâ mơdât mơ’nhê tê kơtê xuân châ pơkâ tơdrăng.

Pôa Vương Đình Huệ, Kăn xiâm hnê ngăn Kuô̆k hô̆i xông tơpui a roh hôp

Tơpui tung tơdroăng xiâm kố, pôa Vương Đình Huệ, Kăn xiâm hnê ngăn Kuô̆k hô̆i tối nhên, pêi pro kơdĭng, hbrâ mơdât mơ’nhê tê kơtê cho troăng hơlâ pêi pro kân dêi Đảng, châ pêi pro tung luât, pakĭng thăm hbrâ mơdât kâ kơhveăm liăn ngân. Xua mê, pin ai tá Luât hbrâ mơdât kâ kơhveăm liăn ngân ƀă luât pêi pro kơdĭng, hbrâ mơdât mơ’nhê tê kơtê, ôh tá xê pơkâ a kơpong pêi cheăng tơnêi têa mê tá kơpong pêi cheăng krê.

Tiô hnê mơhno dêi Ngế pro xiâm hnê ngăn Chin phuh thế nhên, tơdrăng, ki lâi tro thế kheăn kơdeăn, kong pơlê, khu xiâm ki lâi lĕm, tuá pêi ki lâi hôm tro thế po rơdâ, tíu ki lâi pro xôi, pêi cheăng ôh tá châ tơƀrê mê thế pơxâu phâk.

A Sa Ly tơplôu ƀă tơbleăng