VOV4.Sêdang - Hâi lơ 23/3, Khu râ kăn pêi cheăng dêi Vi ƀan xiâm Măt trâ̆n Tơnêi têa Việt Nam xua pôa Phùng Khánh Tài, Kăn phŏ hnê ngăn Vi ƀan xiâm Măt trâ̆n tơnêi têa Việt Nam pơkuâ xiâm hiăng lăm séa ngăn tơdroăng hbrâ rơnáu tâ phĭu rah xo kăn teăng mâ Kuô̆k hô̆i hneăng má XV ƀă kăn teăng mâ Hô̆i đong mâu râ, hneăng hơnăm 2021 – 2026 a kong pơlê Dak Nông.

Vi ƀan xiâm Măt trâ̆n tơnêi têa Việt Nam séa ngăn tơdroăng tâ phĭu rah xo kăn a kong pơlê Dak Nông

Tiô tơbleăng dêi Vi ƀan tâ phĭu rah xo kăn kong pơlê Dak Nông, troh nôkố tơdroăng hbrâ rơnáu tâ phĭu rah xo kăn teăng mâ Kuô̆k hô̆i hneăng má XV ƀă kăn teăng mâ Hô̆i đong kuăn pơlê mâu râ hneăng hơnăm 2021 – 2026 tung kong pơlê hiăng châ pêi pro tro tiô pơkâ. Lâp kong pơlê hiăng mơjiâng 2 Khu tâ phĭu rah xo kăn teăng mâ Kuô̆k hô̆i ƀă 14 Khu tâ phĭu rah xo kăn teăng mâ Hô̆i đong kong pơlê, 8 Vi ƀan tâ phĭu rah xo Hô̆i đong kuăn pơlê râ tơring, 71 Vi ƀan tâ phĭu Hô̆i đong kuăn pơlê râ cheăm.

A roh pêi cheăng ƀă Vi ƀan tâ phĭu rah xo kăn kong pơlê Dak Nông, khu râ kăn séa ngăn dêi Khu pơkuâ Vi ƀan xiâm Măt trâ̆n tơnêi têa Việt Nam pơchân Vi ƀan tâ phĭu rah xo kăn kong pơlê thế teăm tơdrêng châ hlo, mơdât ƀă pơxâu phak mâu tơdroăng ki ôh tá tơtro a tíu cheăng vâ roh tâ phĭu cho hâi kơdrâm phiu ro dêi tâi tâng kuăn pơlê.

Katarina Nga tơplôu ƀă tơbleăng