VOV4.Sêdang - Hâi lơ 22/3, Khu râ kăn pêi cheăng tung Khâu pơkuâ Vi ƀan xiâm Măt trâ̆n Tơnêi têa Việt Nam séa ngăn tơdroăng tâ phĭu rah xo kăn Kuô̆k hô̆i hneăng má XV ƀă rah xo kăn teăng mâ Hôi đong kuăn pơlê mâu râ, hneăng hơnăm 2021 – 2026 a kong pơlê Kon Tum. Klêi kơ’nâi hriăn plĕng hô sơ, mơ-éa dêi Vi ƀan tâ phĭu rah xo kăn kong pơlê Kon Tum ƀă séa ngăn tơdroăng a tơring Đăk Hà, Khu râ kăn séa ngăn hlo, kong pơlê Kon Tum hiăng hbrâ tung hlê plĕng pêi pro mâu mơ-éa ‘na tâ phĭu rah xo kăn ƀă mâu mơ-éa hnê mơhno dêi kong pơlê; veăng tung lâm hnê mơhno tŭm tơdroăng; mâu khu cheăng pơkuâ tơdroăng tâ phĭu rak tơniăn ‘na kơxô̆ mơngế, hâi khế.

Vi ƀan xiâm Măt trâ̆n tơnêi têa Việt Nam séa ngăn tơdroăng tâ phĭu rah xo kăn a kong pơlê Kon Tum

Khu râ kăn séa ngăn dêi Khu pơkuâ Vi ƀan xiâm Măt trâ̆n Tơnêi têa Việt Nam pơchân kong pơlê Kon Tum mâu tơdroăng xiâm tá hâi tro tiô pơkâ, ối hên tơdroăng tá hâi tŭm, môi tiah: mâu kăn u ối inâi tung Khu tâ phĭu rah xo kăn ƀă Tôh tâ phĭu; tơ’nôm kơlŏng tung hô sơ mâu ngế tơbriât to pro kăn kơvâ cheăng lêng; tơdroăng pêi pro tiô pơkâ ‘na hô sơ mơ-éa tơpui tơno rah xo kăn.

Sa Ly tơplôu ƀă tơbleăng