VOV4.Sedang - Viƀan tâ phĭu kong pơlê Dak Lak xua pôa Phạm Ngọc Nghị, Kăn hnê ngăn Viƀan kong pơlê, Phŏ hnê ngăn Viƀan tâ phĭu kong pơlê pơkuâ xiâm hiăng troh séa ngăn  tơdroăng tâ phĭu rah xo kăn teăng mâ Kuô̆k hô̆i hneăng má XV ƀă kăn teăng mâ Hô̆i đông kuăn pơlê mâu râ hneăng hơnăm 2021 – 2026 a pơlê kong krâm Ƀuôn Hồ. Tiô tơbleăng dêi Viƀan tâ phĭu pơlê kong krâm Ƀuôn Hồ,  tơdroăng hbrâ ăm roh hôp hiăng châ pơlê kong krâm hnê mơhno, pêi pro tơniăn tro pơkâ.

Pôa Phạm Ngọc Nghị xông tơpui mơgêi roh pêi cheăng

Viƀan tâ phĭu pơlê kong krâm hiăng tơbleăng pơkâ ‘na tơbleăng tíu tâ phĭu, inâi mâu tíu tâ phĭu ƀă kơxô̆ mâu kăn châ rah xo a rêm tíu tâ phĭu rah xo kăn teăng mâ Hô̆i đông pơlê kong krâm, kăn teăng mâ Hô̆i đông cheăm, bêng. Xông tơpui a mơgêi roh pêi cheăng, pôa Phạm Ngọc Nghị pơkâ  tơdroăng hbrâ thế châ pêi pro nhên, séa ngăn nhên vâ hâi tâ phĭu châ hâi dêi tâi tâng kuăn pơlê. Viƀan tâ phĭu pơlê kong krâm Ƀuôn Hồ hnê mơhno Viƀan tâ phĭu mâu cheăm, bêng pơtối tơkŭm pêi pro mâu hnoăng cheăng tơniăn tro tiô pơkâ; đi đo séa ngăn, mơjiâng tŭm mâu troăng tơniăn gâk kring, tơniăn ăm roh tâ phĭu, hbrâ mâu  tơdroăng mơdât pơreăng, kong prâi pro ôh tá tơniăn.

A Sa Ly tơplôu ƀă tơbleăng