VOV4.Sêdang - Xêo troh hâi lơ 25/3, Việt Nam hiăng ai 6 hâi ôh tá ai ngế tro tâ pơreăng Covid 19 tung pơlê pơla. Troh nôkố, tơnêi têa pin ai tâng tâng 1601 ngế tro tâ pơreăng Covid 19 xua tâ tú tung tơnêi têa, tung mê, kơxô̆ mơngế tro tâ nếo xêo sap ing hâi lơ 27/1 troh nôkố cho 908 ngế. Tâi tâng kơxô̆ ngế ối achê ƀă lo ing kơpong ai pơreăng dế châ klâ ối kơtăn cho 36.480 ngế. Tung kơxô̆ mâu ngế tro tâ Covid 19 dế pơlât, kơxô̆ âm tĭnh ƀă virus SARS-CoV2 cho 120 ngế.

Tiô tơdroăng pâk po rơdâ tơnêi têa, tung hâi lơ 24/3, lâp tơnêi têa ai tơ’nôm 1.906 ngế châ pâk vaccine Covid 19. Hâi lơ 24/3, mâu kong pơlê Quảng Ninh, Tây Ninh, Đồng Tháp hiăng pơxiâm pêi pro pâk vaccine Covid 19. Tiah mê troh nôkố, vaccine 19 hiăng châ pâk a tâi tâng 19 kong pơlê, pơlê kong kơdrâm ối tung hneăng má môi.

            A Sa Ly tơplôu ƀă tơbleăng