VOV4.Sêdang - “Việt Nam hiăng ƀă dế mơdêk pêi pro tiô mâu tơdroăng tơhrâ ƀă hriăn plĕng ki nếo hiăng chêh tung hơnăm 2020, tung mê, ai tơmâng khât troh tơdjêp ƀă mâu tơdroăng pêi pro ƀă tơdroăng pơxá dêi hơnăm ASEAN 2021 châ Brunei Darusaalam tơbleăng”. Mê châ mơhno ki pôa Nguyễn Bá Hoan, Ngế xiâm phŏngăn cheăng pêi - Mô đô̆i rong ƀă rêh ối pơlê pơla tối a Hneăng hôp Hô̆i đong Kuăn pơlê ‘na mơhno túa lĕm tro - rêh ối pơlê pơla (ASCC) roh má 25 châ tơkŭm po tiô tơdroăng mơ’no tơdrêng xua Brunei Darusaalam pơkuâ.

A tíu hrik hyôh mơ’no Việt Nam, ƀă hnoăng cheăng cho Kơ koan pơkuâ Hneăng hôp Hô̆i đong Kuăn pơlê ‘na mơhno túa lĕm tro - rêh ối pơlê pơla a Việt Nam, pôa Nguyễn Bá Hoan ăm ‘nâi: Việt Nam tơngah tâi tâng 15 kơ koan kơvâ cheăng ki tơdjâk troh dêi Kuăn pơlê mơhno túa lĕm tro - Rêh ối pơlê pơla ASEAN kô mơdêk tơdroăng ƀă tơrŭm mâu ki tơdjâk troh tung tơdroăng mơjiâng ƀă pê klêi mâu pơkâ tơdroăng cheăng dêi tơná pơla hơnăm 2021-2025, ai riân troh tâi tâng mâu troăng hơlâ ki nếo ƀă pêi hdrối mâu tơdroăng hiăng pơkâ tung hbrâ mơdât pơreăng ƀă ‘mâi mơnhông klêi kơ’nâi ai pơreăng kân, tơleăng mơnhên mâu tơdroăng ki tơdjâk troh rêh ối pơlê pơla ki rế krâ, hơ’leh hyôh kong prâi ƀă pêi cheăng tiô tuá nếo 4.0.

Gương tơplôu ƀă tơbleăng