VOV4.Sêdang - Hâi lâp plâi tơnêi pêi cheăng lơ 1/5 pơxiâm ing pơlê kong kân pêi cheăng xúa kơmăi kơmok Chicago, kong têa Mih. Mê cho hơnăm 1886, a pơlê kong kân pêi cheăng xúa kơmăi kơmok Chicago, Hneăng hôp Liên đoân Pêi cheăng Mih tơbleăng ăm pêi pro pơkâ tối nhên: “Sap ing hâi lơ 1/5/1886, hâi pêi cheăng dêi tâi tâng mâu kŏng nhân kô cho 8 chôu”.

Xua ti lâi hâi lơ 1/5 châ rah xo, xua a hâi kố tơdroăng tơkêa nếo pơla pêi cheăng ƀă ngế pơkuâ mơngế pêi cheăng kô châ kĭ. Khu pơkuâ mơngế pêi cheăng rơxông tư bản kô ‘nâi hdrối pơkâ dêi kŏng nhân laga ôh tá ‘nâi pro ti lâi vâ mơdât. Laga, hâi lơ 1/5/1886, xua pơkâ dêi kŏng nhân ôh tá châ pêi pro tơxâng tŭm, khu kŏng nhân tung lâp tơnêi têa Mih hiăng veăng pơtê pêi cheăng vâ pro pá ăm khu pơkuâ mơngế pêi cheăng pêi pro troăng pơkâ dêi mâu kŏng nhân. 

Apoăng cho roh pơtê cheăng a pơlê kong kân Chicago. Dâng 40 rơpâu ngế ôh tá troh hngêi kơmăi. Vâi tơkŭm po mitting, tríu tơkêk tung pơlê kong kân ƀă rơkong tối “Sap ing hâi kố ôh tá ai ngế pêi cheăng ki lâi pêi cheăng hluâ 8 chôu môi hâi! Thế pêi pro 8 chôu pêi cheăng, 8 chôu pơtê, 8 chôu xah hêi!” Roh tơplâ djâ rế hía rế kơdrâm mơngế ki veăng.

*** Hâi lơ 1/5 châ ngăn cho hâi ki phiu ro ƀlêi trâng, tối tơdroăng ki khŏm mơ-eăm pêi klêi hnoăng cheăng nếo ƀă mơhno tối tơdroăng tơrŭm ƀă mâu ngế pêi cheăng mâu kong têa ki ê. Hâi lơ 1/5 xuân cho hâi ki kheăn mâu ngế pêi cheăng, pêi pro ăm tơdroăng ki hơniâp lĕm, tơniăn, rơkê plĕng pơlê pơla.

Hâi kố, Hâi Lâp plâi tơnêi pêi cheăng lơ 1/5 cho hâi mơdĭng dêi giai câ̆p kŏng nhân ƀă kuăn pơlê pêi cheăng tơnêi têa pin, hâi tơrŭm gia câ̆p kong nhân ƀă mâu hdroâng kuăn ngo tro ‘nêk mơ’nêa tung lâp plâi tơnêi tung rôh tơplâ xua vâ hơniâp lĕm, tơniăn krê hdroâng mơngế, tơniăn krê ƀă rơkê plĕng pơlê pơla.

Gương - A Sa Ly tơplôu ƀă tơbleăng