VOV4.Bahnar - ‘Năr 18/5, Anih vei lăng jang pơ gang dêh char Lâm Đồng ăn tơ băt, tơ drong set hơ len ‘măng mă 2 hăm 122 ‘nu bơ ngai ƀơm truh bơ ngai jĭ 3141 ưh đei ƀôh pơ rang jĭ COVID-19 ngăl ră. Adrol kơ băt jĭ COVID-19, bơ ngai jĭ 3141 đơ̆ng Bắc Ninh truh tơ̆ Đà Lạt chă tơ mang lăng đơ̆ng ‘năr 2/5 – 5/5 păng chă yak vih vât tơ̆ lơ anih.

‘Ngoăih kơ bơ̆ jang ‘lơ̆ng dôm trong tang găn jĭ, tơ drong pruih pơ gang pơ lôch pơ rang jĭ, vei rơ gŏh cham char kŭm đei dêh char Lâm Đồng bơ̆ jang tôch pơ nĕh

Dêh char Lâm Đồng hlôi akŏm khul jang tơ chă đei 776 ‘nu bơ ngai ƀơm truh (lơ̆m nŏh đei 237 ‘nu bơ ngai F1 păng 539 ‘nu bơ ngai F2), atŭm hăm ‘nŏh pơ gơ̆r ăn oei hơ drô̆ vă tang găn jĭ COVID-19. Dang ei dôm anih jang kơ pal dêh char Lâm Đồng oei ăn oei hơ drô̆ hăm dang 380 ‘nu bơ ngai ƀơm truh bơ ngai jĭ 3141. Lơ̆m kơ sô̆ âu, đei 5 ‘nu bơ ngai ăn oei hơ drô̆ tơ̆ hnam pơ gang, 233 ‘nu bơ ngai mât oei tơ̆ anih tŭm păng 42 ‘nu bơ ngai oei hơ drô̆ tơ̆ hnam. Dang ei tơ drong tang găn jĭ tŏk bŏk đei dôm khul jang kơ pal kơ dêh char tơ lĕch jang tôch pơ nĕh.

Dơ̆ng: Tơ blơ̆