VOV4.Bahnar - Tơ\ hơ năp tơ drong j^ hơ bu\h đei [o#h krê hơ mơt, mă loi ‘no\h j^ hơ bu\h Covid-19, an^h jang pơ gang de#h char Gia Lai hlôi ako\m hơ to\k ‘lơ\ng tơ drong jang tang găn, hơ met j^ păng hơ met ming khu\l jang pơ gang tơ\ tơ ring. Đơ\ng no\h, an^h jang pơ gang hlôi io\k đei lơ jơ nei ‘lơ\ng lơ\m tơ drong jang vei lăng jơ hngơ\m jăn kon pơ lei, mă loi ‘no\h j^ lơ\m tơ drong jang tang găn j^ hơ bu\h Covid-19.

            Hăm jơ hngơ\m đon hơ drin ‘lơ\ng, sơ năm 2020, an^h jang pơ gang de#h char hlôi io\k đei păng yak hlo\h dôm tơ drong hơ găt tơ le\ch ăn. Mă loi ‘no\h j^, hăm j^ Covid-19, an^h jang pơ gang hlôi jang hơ dai hăm rim tơ ring ăn oei hơ dro# hlo\h 14.000 ‘nu ( ăn oei hơ dro# tơ\ an^h jang pơ gang ‘no\h 491 ‘nu, tơ\ an^h ăn oei hơ dro# ako\m 1.363 ‘nu, kơ so# uơ oei dơ\ng ăn oei hơ dro# tơ\ hnam). hăm tơ drong hơ drin păng vang tơ gu\m tang găn j^ tơ po\h lanh să, tru\h dang ei, lơ\m de#h char tam mă đei bơ ngai j^ Covid-19.

            J^ COVID-19 hlôi đei virus tơ pl^h ‘nao, tơ po\h tôch kơ hre\nh, yua thoi no\h Gia Lai hlôi kơ chăng pơ jing hnam pơ gang hơ met tơ\ ‘ngoăih tơ\ An^h hơ met j^ ‘lơ\ng kơ Hnam pơ gang đa khoa de#h char Gia Lai. Kiơ\ kơ ‘no\h, hnam pơ gang hăm kơ sư\k 300 to\ giơng, yak blu\ng vă sơng io\k, hơ met ăn kơ 50 ‘nu. Hnam pơ gang pơm tơ\ ‘ngoăih đei rim an^h jang joăt jang vă pơm lăp hơ met dôm bơ ngai đei tơ po\h j^ SARS-CoV-2 nhen: an^h hơ met plei le\n, an^h răih, an^h rơ ne\h păng an^h hơ met. Vă vei lăng hnam pơ gang, de#h char Gia Lai hlôi ăn [ak si Nguyễn Tấn Phúc – pho\ kơ dră vei lăng Hnam pơ gang Đa khoa de#h char – jang hloi pơm kơ dră vei lăng hnam pơ gang pơm tơ\ ‘ngoăih hơ met j^ COVID-19. Kiơ\ kơ ‘no\h, hnam pơ gang đei tơ drong jang pơ gơ\r sơng io\k, ăn oei hơ dro#, hơ met, vei lăng ăn bơ ngai j^ COVID-19 kiơ\ tơ drong hơ găt păng jang kiơ\ hơ năn ki thuơ\t kiơ\ klăih song hơ n^h đơ\ng An^h vei lăng găh tơ drong jang pơ gang.

Đơ\ng ‘năr 29-1 tru\h ‘năr 21-2-2021, ako\m kơ so# pham, đak mu\h, đak hai đei io\k păng hơ len lăng lơ\m de#h char Gia Lai ‘no\h 17.756 tơ mam pham, đak mu\h, đak hai, lơ\m no\h đei 27 ‘nu đei tơ po\h j^, 45.751 ‘nu ư\h kơ đei tơ po\h j^, uơ oei dơ\ng to\k bo\k gô pơ tôch hơ len lăng. Lơ\m 27 ‘nu tơ po\h j^ SARS-CoV-2 to\k bo\k hơ met tơ\ hnam pơ gang pơm tơ\ ‘ngoăih păng rim hnam pơ gang, đei 3 ‘nu ư\h pă đei [o#h pơ rang j^ ‘măng mă 5, 3  ‘nu ư\h pă đei [o#h pơ rang j^ ‘măng mă 4 păng 1 ‘nu ư\h pă đei [o#h pơ rang j^ ‘măng mă 3. Lơ\m ‘năr 21-2, bơ ngai j^ SARS-CoV-2 mă blu\ng tơ\ Gia Lai oei tơ\ phường Cheo Reo, thị xã Ayun Pa, hơ met tơ\ hnam pơ gang thị xã Ayun Pa hlôi bro\k đơ\ng hnam pơ gang đơ\ng ro\ng kơ đei hơ len lăng 5 ‘măng ư\h kơ pă đei [o#h pơ rang j^ dơ\ng.

Hơ nơ\ng tơ le\ch jang đei yua rim trong jang tang găn j^ Covid-19, ư\h kơ le# j^ tơ po\h lanh lơ\m tơ pôl, mă loi ‘no\h j^ đơ\ng ro\ng năr Tết Nguyên đán 2021, An^h pơ gơ\r jang tang găn j^ Covid-19 de#h char Gia Lai ‘nao đei hla ar kơ so# 33/CV-BCĐ găh tơ drong dăr lăng rim kon pơ lei đơ\ng rim tơ ring đei j^ Covid-19 bro\k tơ\ de#h char.

Kiơ\ kơ ‘no\h, An^h pơ gơ\r jang tang găn j^ Covid-19 de#h char athei An^h vei lăng găh tơ drong jang pơ gang athei khu\l jang pơ gang de#h char, apu\ng. xăh hơ to\k loi dơ\ng jang hơ dai hăm rim an^h jang [ơm tru\h tơ\ rim tơ ring chă [o#h hro#ih dôm bơ ngai tơ po\h j^ SARS-CoV-2 đơ\ng dôm tơ ring đei j^ lơ\m te\h đak, kiơ\ đơ\ng ‘no\h vei lăng tơ tom tơ drong tơ po\h lơ\m tơ pôl. Pơ gơ\r tơ păt tơ drong tơ roi tơ băt y tế păng dăr lăng hăm bơ ngai tru\h đơ\ng rim tơ ring đei j^ lơ\m te\h đak kiơ\ tơ băt hơ dăh đơ\ng An^h tơm vei lăng găh tơ drong jang. Đ^ dăng dôm bơ ngai đơ\ng dôm tơ ring đei j^ lơ\m te\h đak năm tơ\ de#h char Gia Lai lơ\m dang 14 năr tă kơ athei pơm kiơ\ tơ roi tơ băt y tế kơ tă ăn kơ an^h jang kơ pal.

An^h vei lăng găh tơ drong jang pơ gang ako\m vei lăng j^ jăn de#h char pơ tho trong dăr lăng y tế hăm bơ ngai tru\h đơ\ng dôm tơ ring đei j^ lơ\m te\h đakpăng tơ roi hơ nơ\ng tơ drong j^ hơ bu\h vă kơ rim an^h jang, tơ ring kơ chăng băt hơ dăh tơ drong tơ le\ch jang kiơ\. Hơ to\k loi dơ\ng io\k pham hơ len lăng hăm dôm bơ ngai jâu tơ po\h j^ păng io\k pham tơ\ dôm hơ n^h gre dơ\ng, cham gre păr vă vei lăng hơ nơ\ng.

            Hơ nơ\ng athei rim hnam pơ gang, an^h khăm – hơ met j^ hơ nơ\ng tơ le\ch jang păng hơ len lăng kiơ\ tơ drong pơ kăp  Hnam pơ gang sơ đơ\ng păng an^h khăm sơ đơ\ng tang găn j^ Covid-19; athei lăng tru\h dôm bơ ngai đei bro\k năm đơ\ng dôm tơ ring đei j^, jang kiơ\ tơ roi tơ băt y tế hăm đ^ đăng bơ ngai năm tơ\ hnam pơ gang, an^h jang pơ gang, an^h khăm; jang kiơ\ klăih song hơ n^h păng dăr hơ len y tế kơ jăp.

Tơ\ hơ năp đei [o#h tôch kơ krê hơ mơt đơ\ng j^ COVID-19 tơ\ de#h char Gia Lai, blu\ng khei 2/2021, Pho\ kơ dră An^h tơm vei lăng găh tơ drong jang pơ gang Đỗ Xuân Tuyến hlôi năm bơ\ jang hăm de#h char Gia Lai. Pho\ kơ dră tơm tơ tă kơ de#h char Gia Lai đei lơ kon pơ lei kon kông kơ ka kăl kơ bơ ngơ\t tru\h tơ roi tơ băt tang găn j^ tru\h tơ ring kon pơ lei kon kông, jang ‘lơ\ng tơ drong jang tơ roi tơ băt, jang kiơ\ trong jang kăl “ 4 kơ tă an^h”, jang kiơ\ tơ drong tơm hơ dai. ‘Ngoăih kơ tang găn j^ COVID-19, kăl kơ lăng kăl tru\h tơ drong jang tang găn dôm tơ drong j^ nai hai.

Thuem: Tơ blơ\