VOV4.Bahnar - Tơ roi tơ băt ‘nao hloh, đei lơ bơ ngai bơ ngơ̆rt truh, ‘noh jĭ 144 ‘nu bơ ngai arih lơ̆m tơ ring pơ gang văn tơ̆ trong 189/1 Mai Hắc Đế, phường Tân Thành, pơ lei tơm Buôn Ma Thuột, Dak Lak pơ tôch hơ len tă ư̆h kơ đei pơ rang  jĭ SAR-CoV-2. Mă lei ư̆h kơ gơ̆h pơ hơi, tơ drong jang tang găn jĭ Covid-19 oei hơ nơ̆ng đei khŭl kơ dră păng anih jang kơ pal dêh char Dak Lak tơ lĕch jang kơ tang.

Đơ̆ng rŏng kơ đei ƀôh bơ ngai mă blŭng đei tơ poh jĭ SAR-CoV-2, anih jang pơ gang dêh char Dak Lak hlôi đei hla ar gơ̆ih kơ rim anih jang găh sư athei ư̆h kơ asong pơ dơh phep, ư̆h kơ pơ gơ̆r khŭl năm hŏk pơ hrăm, tơ mang lăng vă vei sơ đơ̆ng bơ ngai jang tang găn jĭ COVID-19.

Kiơ̆ kơ ‘noh, athei rim anih jang găh sư pơ dơ̆h ‘mơ̆i ư̆h kơ asong ăn pơ dơh phep hăm bơ ngai jang ( ư̆h kơ jô̆ bơ ngai đei tơ drong kăl tơ pă); ư̆h kơ pơ gơ̆r khŭl năm hŏk pơ hrăm, tơ mang lăng ( lơ̆m teh đak păng tơ̆ teh đak đe) lơ̆m khei ‘năr tơ roi tơ băt hơ mơt kơ tơ poh lanh jĭ COVID-19; akŏm bơ ngai jang vă vei sơ đơ̆ng bơ ngai jang ăn tơ drong jang tang găn jĭ, khăm hơ met tơ̆ rim hnam pơ gang, tơ tom pơm lăp hăm ‘mĕh vă vei lăng păng hơ tŏk ‘lơ̆ng jơ hngơ̆m jăn kon pơ lei lơ̆m dêh char.

Hơ dai hăm ‘noh hơ tŏk loi dơ̆ng hơ len lăng, hơ met ming tơ drong jang kiơ̆ rim tơ drong hơ găt găh tang găn jĭ tơ̆ anih jang; kơ dră vei lăng rim anih jang pŭ hơ năp jang tơ̆ hơ năp Kơ dră chĕp kơ̆l anih vei lăng jang pơ gang hăm dôm bơ ngai jang ư̆h kơ pơm kiơ̆ dôm tơ drong hơ găt găh tang găn jĭ COVID-19; pơ jao kơ Khŭl jang dăr hơ len lăng kơ Anih vei lăng găh jang pơ gang pơ gơ̆r, jang hơ dai hăm anih jang, khŭl jang ƀơm truh bơ̆ jang kiơ̆ hơ len lăng, dăr lăng tơ drong tơ lĕch jang kiơ̆ rim tơ drong athei găh tang găn jĭ COVID-19 tơ̆ rim anih jang găh sư vei lăng; phak kơ hret rim khŭl grŭp, bơ ngai pơm glăi găh tang găn jĭ.

Anih vei lăng găh jang pơ gang kŭm athei rim anih jang hơ nơ̆ng tơ lĕch jang kiơ̆ tơ păt dôm trong jang tang găn jĭ COVID-19 kiơ̆ athei đơ̆ng rim kơ dră gơ̆h kĭ ăn, athei đơ̆ng Anih vei lăng kon pơ lei dêh char tơ̆ Hla ar kơ sô̆ 3743, ‘năr 4-5-2021 đơ̆ng Anih vei lăng kon pơ lei dêh char păng rim nơ̆r athei đơ̆ng Anih vei lăng găh jang pơ gang găh tang găn jĭ COVID-19. Lăng kiơ̆ tơ drong jang, hơ năp jang păng tơ drong bơ ngai jang đơ̆ng anih jang bơ̆ jang hơ dai hăm anih jang, tơ ring pơ jing trong jang, tơ lĕch rim tơ drong jang vei sơ đơ̆ng tơ drong jang pơ gang lơ̆m khei ‘năr pơ gơ̆r pôk rơ̆ih bơ ngai tang măt Kuôk hô̆i jăl 15 păng bơ ngai tang măt Jơ nŭm pơ gơ̆r kon pơ lei rim tơ ring lơ̆m dêh char jăl jang 2021-2026.

Bơ ngai jang kơ Anih vei lăng tơ drong jĭ jăn dêh char iŏk đak muh, pham hăm kon pơ lei tơ ring đei pơ vang găn tơ̆ trong 189/1 Mai Hắc Đế

Hăm rim hơ nih khăm hơ met jĭ, Anih vei lăng găh jang pơ gang athei jang kiơ̆ hơ met ăn bơ ngai jang bơ̆ jang lăp hăm tơ drong bơ ngai jĭ, klăih song hơ dăh bơ ngai jang, klăih song grŭp bơ̆ jang pơ lơ̆h băl; pơ jing trong jang tơ jră kiơ̆ rim tơ drong đei ƀôh jĭ COVID-19, lơ̆m noh đei trong tơ lĕch jang hơ dăh găh klăih song bơ ngai jang, rim grŭp pơ lơh băl bơ̆ jang, chơ tơ̆ hơ hnam pơ gang, sơng iŏk bơ ngai jĭ, vei lăng ư̆h kơ ăn đei pơ rang jĭ, tang găn hơ drol tơ poh jĭ lơ̆m hơ nih khăm hơ met jĭ mư̆h đei ƀôh jĭ tơ̆ hơ nih jang.

 Tơ̆ hơ năp đei ƀôh krê hơ mơt đơ̆ng jĭ COVID-19, khŭl kơ dră apŭng Cư M’gar, dêh char Dak Lak tŏk bŏk hơ tŏk loi dơ̆ng bơ̆ jang tơ păt dôm trong jang tang găn jĭ. Iŏk đơ̆ng lơ̆m tơ ring đei 1 ‘nu jâu jĭ, đei ƀơm đơ̆ng hơ nih đei jĭ brŏk đơ̆ng Đà Nẵng, mă đơ̆ng hơ len lăng ‘măng mă 1 ăn ƀôh ư̆h kơ đei pơ rang jĭ, mă lei hơ mơt kơ tơ poh jĭ oei đei đĕch, Anih pơ gơ̆r jang tang găn jĭ COVID-19 apŭng Cư M'gar hlôi tơ lĕch jang tơ drong jang tang găn jĭ tŏk kơ jung hloh 1 kơ sô̆. Hơ dai hăm ‘noh, dăr hơ len, vei kơ jăp tơ drong jang kiơ̆ rim tơ drong jang tang găn jĭ lơ̆m tơ ring, mă loi ‘noh jĭ dôm tơ ring hơ nơ̆ng đei bơ̆ jang akŏm lơ bơ ngai. Tơ̆ kơ chơ tĕch mơ dro thị trấn Quảng Phú – hơ nih tĕch mơ dro tơm kơ apŭng Cư M’gar, Anih vei lăng kơ chơ ăn bơ ngai hơ nơ̆ng tơ tă kơ kon pơ lei, krao hơ vơn bơ ngai tĕch mơ dro gom muh măt lơ̆m kơ plăh tĕch mơ dro, pơ ma dơ nuh hăm bơ ngai chă năm lăng, răt tơ mam tơ̆ kơ chơ; pơ trŭt kon pơ lei pơm kiơ̆ răt hrĕnh dôm tơ mam yua kăl, ư̆h kơ akŏm lơ bơ ngai pơ ma dơ nuh nhen hơ drol... Dôm trong jang âu đei kon pơ lei, bơ ngai tĕch mơ dro tôch kơ tơ gŭm. Rim hơ nih tĕch mơ dro dôm kơ loăi pơ vih pơ văn ư̆h kơ kăl lơ̆m apŭng khei ‘năr âu kŭm tŏk bŏk pơm kiơ̆ kơ jăp trong jang tang găn jĭ... Đĭ đăng 40 hơ nih hơ ri karaoke, bi-da hloi tang ‘măng, pơ dơh kơ jang ngăl bơih.

Tơ̆ hơ năp đei ƀôh krê hơ mơt đơ̆ng jĭ hơ buh, Anih vei lăng kon pơ lei dêh char Dak Lak hlôi tơ lĕch hla ar găh tơ drong tơ lĕch jang rim trong jang tang găn jĭ ƀơ̆t lơ̆m dêh char hlôi đei bơ ngai jĭ COVID-19. Kiơ̆ kơ ‘noh, dêh char Dak Lak athei Kơ dră anih vei lăng kon pơ lei rim apŭng, rim xăh kơ chăng jang hơ dai hăm rim anih jang đei ƀơm truh athei tơ mơ̆t yua rim trong jang tang găn jĭ lơ̆m tơ ring đơ̆ng tŏk bŏk măng ‘năr 10/5/2021 ding truh đei tơ roi tơ băt ‘nao.

 Thuem: Tơ blơ̆