VOV4.Bahnar – Đơ̆ng rŏng 41 năr hơmet jĭ, ăh năr 25/6, bơngai ƀơm jĭ COVID -19 kơsô̆ pơkăp 3836 tơ̆ Đăk Lăk hlôi axong lĕch đơ̆ng hnam pơgang hăm tơdrong xô̆ hơ̆k đơ̆ng unh hnam păng đe thây pơgang. Bơngai jĭ COVID -19 kơsô̆ 3836 noh F1 kơ bơngai jĭ 3052 tơ̆ Thuận Thành, Bắc Ninh. 'Nâu jing bơngai ƀơm jĭ hlăm. Đơ̆ng rŏng kơ mơ̆t hơmet jĭ tơ̆ hnam pơgang, xư jĭ trong dui jơhngơ̆m tôch kơtang, kơtoăl pham păng athei dui jơhngơ̆m hăm kơmăi, athei yua khang sinh, huch pơgang pơm brai pham kơtoăl, hlŏng pham... Anih jang y tê̆ Đăk Lăk hlôi axong 3 'nu thây pơgang, ƀak sih đơ̆ng hnam pơgang tơm tơring Tây Nguyên truh Hnam pơgang hơmet jĭ Lao păng jĭ tơxoh vă hơmet tơtom ăn bơngai jĭ âu. Hnam pơgang  Chợ Rẫy plei tơm Hồ Chí Minh duh pơtruh 3 'nu juăt jang truh tơgŭm vă hơmet klaih jĭ. Truh dang ei, đơ̆ng rŏng 3 'măng iŏk hơlen pham hăm pơkăp âm tĭnh, bơngai jĭ âu đei axong lĕch đơ̆ng hnam pơgang vih tơ̆ hnam hơlen pơm kiơ̆ ƀlep pơkăp đơ̆ng Anih tơm y tê̆.  

Lan chih păng pơre nơ̆r