VOV4.Bahnar -  Hăm đon kơchĕng athei vei răk tơƀăk mong păng pơtho tơdrong jang tanh brai ăn khul mơlôh, ngê̆ nhơ̆n H’Blong Knul, tơ̆ xăh Ea Trul, apŭng Krông Bông, dêh char Đăk Lăk hlôi hăt hot vang hŏk lăm pơtho tơdrong jang ăn hơdruh tơdăm đei pơgơ̆r tơ̆ tơring. Yă H’Blong duh kơdih tanh hla che ‘măn yua lơ̆m unh hnam păng kiơ̆ đơ̆ng chih măt răt vă hơtŏk tơdrong ttanh brai păng hơtŏk iŏk yua.

Dôm năr pơm kiơ̆ pơkăp oei ataih băl lơ̆m tơpôl vă tang găn păng tơjră pơrang jĭ Covid-19, tơdrong vih vơ̆t păng jang mir kơ unh hnam ƀơm răm noh pơmai H’Giang Knul tơ̆ pơlei Ja, xăh Ea Trul, apŭng Krông Bông, dêh char Đăk Lăk đei lơ jơ vă keh đang hơbăn ao tŏk bŏk oei tanh. Pơmai H’Giang ăn tơbăt, tanh brai jing tơdrong jang ăh rơvơn vă hơtŏk iŏk yua. Lơ xơnăm kơ âu, dôm tơmam tanh lơ̆m unh hnam mă pơmai pơjing, đei lơ bơngai băt truh păng răt. Kơyuơ noh, pơđĭ 3 ‘nu pơmai oh pơmai adoi băt tanh brai kloh klĕch lơ hơbăn ao tanh kơ bơngai Êđê: Đei mĕ gơh tanh noh pơtho ăn kơ inh. Mă blŭng hŏk adoi tơnap, mă lei dar deh noh kloh klĕch, nhen băt dui brai, băt tanh, băt xĭt ao kiơ̆ pơdok juăt jue kơ bơngai Êđê.

Pơmai H’Giang noh kon mă 3 kơ ngê̆ nhơ̆n H’Blong Knul (đe juăt krao aduôn Jim). Tơ̆ pơlei Ja duh nhen tơ̆ apŭng Krông Bông, yă H’Blong đei băt truh noh ngê̆ nhơ̆n tanh brai rơgei, pơjing lơ tơmam drăm ‘lơ̆ng. Atŭm hăm khăn, buk, kơn pŭ, hơbăn ao, tơpen, yă H’Blong oei đei đe chih măt tanh dôm kơloăi kơn lơ̆k kơƀang, kơn pơrŏ chơnĕng  ăn dôm anih tĕch tơmam, khăch sạn lơ̆m păng ‘nguaih kơ dêh char. Yă H’Blong tơroi, dôm xơnăm adrol ki, yă đei lơ đe chih măt răt noh athei gơnơm đe kon tơgŭm pơtơm tanh keh pơjao trŏ pơkăp ăn bơngai răt, xơnăm âu kơyuơ đơ̆ng pơrang jĭ noh ưh gan đei lơ đe chih măt răt tơmam. Mă thoi noh, dôm năr kơ âu, yă duh oei axong jơ ‘năr tanh hơbăn ao vă ‘măn răk. Noh jing tơdrong juăt, duh jing trong vă hơtŏk juaih ti păng măt gơh hơbĕch hloh: Inh gơh tanh đơ̆ng kơplăh 15 xơnăm, truh dang ei ăh đei kon xâu noh hlôi kloh klĕch păng duh ‘meh vă chă pơtho pơdjoi vei răk tơƀăk mong dôm um ai joh ayŏ mă yă ƀok pơxư̆ ăn, mă hăt noh tơdrong tanh brai âu.

Kiơ̆ kơ ƀok Châu Phan, Phŏ Kơdră Anih Joh ayŏ Tơroi tơbăt apŭng Krông Bông, dêh char Đăk Lăk, tơ̆ xăh Ea Trul păng dôm tơring tơjê̆ kơ apŭng Krông Bông, dôm xơnăm tơjê̆ âu roi đei lơ pơmai oh gơh tanh brai. Kĕ đei tơdrong âu noh minh păh đei tơgop đơ̆ng ngê̆ nhơ̆n nhen yă H’Blong Knul, hlôi kơtă pơtho ăn khul mơlôh. Khei năr âu ki, yă H’Blong hăt hot pơtho ăn hloh 100 drăkăn tơ̆ dôm tơring băt chă tanh brai kloh klĕch: Ngê̆ nhơ̆n H’Blong Knul ‘nao năm akŏm joh ayŏ kră xơ̆, pơih dôm lăm hŏk găh hri hơxuang, hri  ay – ray. ‘Nguaih kơ noh ngê̆ nhơ̆n duh hlôi năm tơgŭm lăm pơtho tanh brai yuơ anih pơtho tơdrong jang ăn hơdruh tơdăm Đăk Lăk pơgơ̆r tơ̆ xăh Ea Trul nhen pơlei Cư Mil, pơlei Ja, pơlei Plum, pơlei Băng Cung păng pơlei Mnang Dơng tơ̆ xăh Yang Mao vă pơtho găh tanh brai juăt jue.

Yă H’Blong tơroi, tơdrong tanh brai noh athei vei răk pơdjoi ăn đe mơlôh, vă ning mônh kơnh, bơngai Êđê ưh đei hiong um ai joh ayŏ âu. Kơyuơ noh, lơ̆m khei năr âu ki, ưh adrô̆ pơtho ăn kon xâu, yă oei adrin pơtho ăn lơ bơngai lăp păng ‘meh hŏk tanh brai.

Hăm tơdrong adrin, dăp đon lơ̆m tơdrong pơtho, yă H’Blong hlôi đei lơ anih jang, jăl jang pôk bơnê, duh nhen đei iŏk lơ tơmam hơpăh lơ̆m dôm tơdrong pơlong tih, iĕ lơ̆m dêh char. Yă chơt hơ iă oei đei Kơdră teh đak pôk ăn hơnăn “Ngê̆ nhơ̆n Ưu tŭ” xơnăm 2019 kơyuơ hlôi đei lơ tơdrong plang kăp gĭt lơ̆m tơdrong vei răk tơƀăk mong joh ayŏ kăp gĭt kơ hơdrung hơdrĕch.

Lan chih păng pơre nơ̆r