VOV.Bahnar - Tơ̆ Đắk Lắk, Khŭl jang găh Đak păng Cham char Việt Nam jang hơdai hăm Anih pơvih pơvăn Vei lăng Tơring tơrang ‘nao Trung ương, Hơnih Tơproh jang păng dăr hơlen tơmam drăm đak kơ Teh đak kŭm hăm Anih vei lăng kon pơlei dêh char Đắk Lắk pơgơ̆r hop akŏm hăm hơnăn: “Vei lăng, iŏk yua păng pơtrŭt tơmơ̆t jên jang hơtŏk tơiung tơmam drăm đak tơklep hăm choh jang sa, tơring tơrang ‘nao păng ŭnh hơyuh rơgoh tơring Tŏk bŏk - Tây Nguyên”.

VOV.Bahnar - Lơ̆m khei năr Việt Nam lăng truh tŏk tĕch mơdro tơ̆ teh đak đe kơjăp ‘lơ̆ng, rim tơdrong tơchơ̆t găh hơlen tơmam drăm, rơgoh ‘lơ̆ng tơmam drăm (SPS) păng mă kăl ‘noh Tơdrong tơchơ̆t 280 đơ̆ng Hơnih tơm Vei lăng tĕch răt hăm teh đak đe Trung Quốc tŏk bŏk pơjing tơdrong trăp trin ăn hơnih mơdro sa. Mă lei, ‘nou jei jing hơyak kăl vă hơnih choh jang sa tơplih kiơ̆ trong jang ‘lơ̆ng, tơpăt păng kơjăp ‘lơ̆ng hloh dơ̆ng. 

VOV.Bahnar - Kon pơlei tơ̆ tơring groi kông găh Pơmât dêh char Quảng Ngãi oei tơgĕch iŏk bri ‘long kơdrơ̆ng vă tưk tơiung tơdrong pơtăm ‘long pơgang, pơm ăn “bri ‘long” jing tơdrong jang sa kơjăp ‘lơ̆ng. Đơ̆ng dôm trong jang pơtăm ‘long pơgang hơla yơ̆p bri, kon pơlei Xơ Đăng pơm hơtŏk đei iŏk yoa hai, vang tơgop vei lăng bri brăh hai, pơih đei trong jang tŏk muk drăm tơklep hăm vei lăng cham char bri brăh ăn tơring groi kông.

VOV.Bahnar - Tơ̆ Gia Lai, tŏk bŏk lơ̆m jơ ‘năr phang pơđang hloh, tơdrong hơmơt ŭnh sa jĭ tôch kơtang mưh lơ̆m dêh char hrei ou đei vă jê̆ 1 triu haktar bri lơ̆m dêh char. Tơ̆ hơnăp tơdrong ou, khul vei lăng bri păng rim tơngla bri tŏk bŏk tơlĕch kơtang trong jang “4 kơtă”, vei kơjăp gak vei lăng 100% măt bơngai jang, atŏk kơtang năm pơtrui, kmăi kmŏk dăr lăng hơlen hơnih ŭnh sa đơ̆ng hơtăih, adoi atŏk kơtang pơrô̆ pơrôp, pơtho tơbăt ăn kon pơlei kĭ pơkăp vei lăng bri, iung jang tang găn hơlou ŭnh sa bri.

VOV.Bahnar - Tơ̆ hơnăp đei ƀôh krê hơmơt đơ̆ng jĭ tơ̆ kon tơrong, mă loi ‘noh jĭ klak chroh nhŭng châu Phi păng hơmơt kơ đei mơ̆t tơpoh đơ̆ng yŏng jĭ rơ ka ƀơ̆r tơplŏ kơchôp, dêh char Đắk Lắk tŏk bŏk tơlĕch jang hrơ̆ch lơ trong jang vă vei lăng kon tơrong, sơđơ̆ng rong kon tơrong păng tơjur hiong răm ăn kon pơlei.

VOV.Bahnar - Hăm trong atŏk tơ iung rơgoh ‘lơ̆ng, dêh char Dak Lăk tŏk bŏk akŏm atok kơtang pơtrŭt tơmơ̆t jên jang lơ̆m tơdrong choh jang sa kmăi kmŏk hơgei, hơnih kmăi kmŏk pơm tơlĕch tơmam drăm păng unh hơyuh, pơjing hơyak pran ăn trong tơlĕch jang tŏk mŭk drăm ƀar kơsô̆ lơ̆m jăl truh ou kơnh.

VOV.Bahnar - Tơ̆ dôm tơring sơlam Ea Bung, Ea Súp, Ia Lốp, tơring đei lăng jĭ “tơring đei tŏ phang pơđang kơnê̆ hlŏh” kơ dêh char Đắk Lắk, tơdrong choh jang sa đei tơplih roi ‘lơ̆ng hơiă. Đơ̆ng dôm chŭn na iơ iĕ, gơnang gơnăi đơ̆ng săy phŏng, pruih pơgang, dang ei hlôi đei pơgơ̆r chih jang sa kiơ̆ trong akŏm 1 ƀôt, tơmơ̆t yoa kơmăy kơmŏk ‘nao, dar deh choh jang sa kiơ̆ trong jang hăm mơ̆r.

VOV.Bahnar - Đơ̆ng rŏng ‘mi tih đak lơ̆p tôch kơ dêh hơtuch sơnăm 2025 pơm ăn hiong răm kơtang, kon pơlei jang chŭn mir xăh Hòa Thịnh păng phường Đông Hòa (dêh char Đắk Lắk) hlôi ƀrư̆ ƀrư̆ tơiung ming jang sa gơnang đơ̆ng tơdrong tơgŭm tơtom găh hơdrĕch, tơmam păng ki thuơ̆t. Pơyan ƀa phang sơnăm 2025–2026, dôm kơdơ chŭn ƀa tơiung ming pran kơtang, plei tŏk lơ dang 20%, ưh khan lăp hơnhăk ăn tơdrong chơt hơiă đei ƀa lơ oei oei tơƀôh hơdăh jơhngơ̆m tơjră pŭ, tơdrong kĕ yak tŏk kơjăp đơ̆ng kon pơlei đơ̆ng rŏng ‘mi tih đak lơ̆p pơrăm.

VOV.Bahnar - Ƀơ̆t mă tŏ ‘mi kial tơplih roi đunh roi kơnê̆, tơdrong rơih dôm kơloăi ‘long pơtăm lăp hăm tŏ ‘mi kial, lăp hăm tơring teh, vă hơnhăk ba iŏk yoa sơđơ̆ng ‘lơ̆ng tŏk bŏk jing tơdrong tôch kăl. Tơ̆ dêh char Đắk Lắk, mă loi tơ̆ dôm tơring phang pơđang, teh kơnê̆ tơ̆ găh Pơmât, tơring sơlam, ‘long kram oei pơih đei tơdrong hơmet pơjing tơdrong jang sa sơđơ̆ng ‘lơ̆ng ăn kon pơlei, hơdai hăm ‘nŏh vang tơgop pơm hơtŏk tơdrong jang mŭk drăm rơgŏh ‘lơ̆ng.

VOV.Bahnar - Kơplăh dang ei, dêh char Gia Lai oei mât ƀât tŏk bŏk pơyan phang, ‘năr tŏ hang đunh pơm ăn đak tơ̆ lơ dơnâu, đak krong, thong đak hrŏ hrenh. Tơdrong ưh kơmăh đak oei jing đon tơtăm hơmơt đei tŏ phang pơđang hăm kơhrĕng hecta ‘long pơtăm, mă loi tơ̆ dôm tơring găh Pơmât kơ dêh char Gia Lai.