Dơnou đak Ia Mơr đei jên asong jang jê̆ 3.000 tih hlj, kĕ mong jê̆ 180 triu m3 đak, đei ming man vă asong đak ruih ăn pơhlom 12.500ha teh choh jang păng đak sŏ nhă ăn pơhlom 50.000 'nu bơngai tơ̆ 2 dêh char Gia Lai păng Đăk Lăk. Xah sơlam  Ia Rvê, dêh char Đăk Lăk hlôi hơlen lăng pơhlom 1.100 ha tơ̆ dôm thôn 6, 7, 8, 9 păng 11 vă tơlĕch pơih să tơring đei đak ruih jăl 2 kơ Tơdrong ming man dơnou mong đak Ia Mơr. 

Đơ̆ng chă hơlen, ƀok Lương Nguyễn Minh Triết, Bí thư Tĭnh uy Đăk Lăk ră hơdah, asong ming man dơnou mong đak tơ̆ tơring sơlam jing kăp gĭt lơ̆m tơdrong hơtŏk pơm jang, tơjur hin dơnuh kơjăp sơđơ̆ng, sơđơ̆ng tơring kon pơlei oei xa păng vei sơđơ̆ng tơpôl. Kơyuơ noh, dôm hơnih jang đei tơrĕk athei jang hơdoi hăm hơnih jang Trung ương pơjing trong asong ming man hơbong đak ăn 1.100 ha hlôi hơlen vei sơđơ̆ng hơdah, ưh đei hơlơ̆k hơle hăm dôm tơdrong jang nai. Gah đunh đai kơnh, pơkăp pơnơ̆ đak athei jô̆ hơlen truh tơdrong kăl yua kơ 12 thôn lơ̆m xah.