Đắk Lắk dang ei đei lơ tơmam đơ̆ng choh jang sa đei tơm vang tĕch tơ̆ teh đak đe, lơ̆m noh cheh phe, sầu riêng, tiu ‘noh jĭ dôm tơmam đei kơjă măk. Sơnăm 2025, jên tĕch tơmam tơ̆ teh đak đe kơ tơring đei dang 2,8 ti USD; hơdrô̆ cheh phe păng sầu riêng tơgop hloh 1 ti USD. Đắk Lắk tŏk bŏk tơlĕch ăn ‘meh vă roi ‘năr roi kơhret găh tơdrong ‘lơ̆ng, vei rơgoh ‘lơ̆ng tơmam sa, tơchă băt anih pơm tơlĕch păng hơmet ‘lơ̆ng tơring tơmam vă pơvei păng pơih să dôm anih tĕch mơdro tơ̆ teh đak đe.

Đắk Lắk hơdrin hloh 90% anih pơm tơlĕch, tĕch mơdro tơmam đơ̆ng choh jang sa đei asong hla ar pơkăp đei tôm tơdrong ‘lơ̆ng dăh mă dôm hla ar pơkăp apŭng plĕnh teh găh vei rơgoh ‘lơ̆ng tơmam sa; đĭ đăng anih jang iĕ le kĭ pơkăp pơm kiơ̆ tơdrong hơgăt. Kăl kơ lăng truh, 100% tơring, hơnih tah hơmet pơyua ăn tĕch tơ̆ teh đak đe đei asong mã kơsô̆, hơnơ̆ng dăr lăng păng 100% tơmam tĕch tơ̆ teh đak đe bơ̆jang kiơ̆ tơchă băt anih pơm tơlĕch kiơ̆ athei đơ̆ng anih tĕch mơdro răt tơmơ̆t.