Hơnih pơtrŭt choh jang xa kơ teh đak ăn tơbăt, Tơchơ̆t 36 đơ̆ng Jơnŭm pơgơ̆r teh đak tơlĕch năr 31/7 hlôi pơm ƀônh hiôk hla bar asong ăn kơsô̆ pơkăp tơring pơtăm kơsô̆ pơkăp hơnih tah 'nŭng. Tơdrong asong păng vei lăng mã kơsô̆ đei pơm jang kiơ̆ mạng tơpôl, kiơ̆ tơchơ̆t hơnih jang, bơngai jang kơdih chă chih tơroi, pŭ sơnong jang, tơguăt hăm tơdrong hơlen băt tơm a la chă. Đơ̆ng rŏng jê̆ 2 khei pơtơm jang, jơ̆l teh đak hlôi asong 'nao đei  787 kơsô̆ pơkăp tơring pơtăm.

Tơ̆ Gia Lai, yă Nguyễn Thị Tố Chân, Phŏ Kơdră Anih vei lăng găh Choh jang xa păng Cham char ăn tơbăt, lơ̆m dêh char asong đei 43 kơsô̆ pơkăp tơring pơtăm, hơtŏk akŏp kơsô̆ pơkăptơring pơtăm lơ̆m dêh char tŏk 424 kơsô̆ pơkăp: “Tơdrong chih akŏm yư lĭu kơtơ̆ng ang ăn kơ bơ̆n ƀôh tơdrong lăng hơlen jơ̆p jang 'noh ‘meh vă đơ̆ng kon pơlei 'noh đei. Mă lei, tơdrong hlôh vao đơ̆ng kon pơlei tam mă hơtŏ dih băl, kơna athei hơnơ̆ng tơroi tơbăt, pơrô̆ pơrôp, pơtho tơbăt vă đe hlôh akhan tơdrong iŏk mĭnh kơsô̆ pơkăp tơring pơtăm 'noh iŏk mĭnh hơnih vă sơkơ̆t hơdăh kơjă tơmam drăm kơdih. Mưh hlôh vao kon pơlei hlôi đei hơtŏk 'noh gô keh đang đei tơdrong tơchă băt tơm a la chă. Đơ̆ng noh, rim hơp tak xah, hơnih mơdro sa pơjing tơgoăt jang hơdoi lơ̆m yư lĭu đơ̆ng kon pơlei."

Mă đơ̆ng hla bơ ar asong ăn kơsô̆ pơkăp tơring pơtăm hlôi hiôk hian ƀiơ̆, bơngai tang măt ăn anih mơdro sa păng hơp tak xăh akhan vei sơđơ̆ng mã kơsô̆ kiơ̆ rim pơyan 'mơ̆i 'noh jĭ tơdrong kăl kơchăng. Vă jang đei tơdrong 'noh, bơngai pơm tơlĕch athei chih hơlen tơdrong choh pơtăm, vei lăng tơmam jang blŭng, chih tơmơ̆t hla bơar hô sơ; anih tăh lơ̆m tơpu athei vei sơđơ̆ng dôm tơdrong hlôi chih măt. 'Nâu jĭ dôm tơdrong kơtơ̆ng ang kăl vă tơchă băt tơm a păng vei lăng 'lơ̆ng tơmam đơ̆ng choh jang xa đei. Dôm anih jang kŭm apĭnh pơjing trong jang vă khŭl pơtrŭt choh jang sa tơpôl vang jang pơvih pơvăn ki thuơ̆t, tơgŭm ăn kon pơlei jang chŭn mir pơm kiơ̆ păng vei sơđơ̆ng dôm tơdrong pơkăp đơ̆ng kơsô̆ pơkăp.

Ƀok Lê Quốc Thanh, Kơdră vei lăng Anih pơtrŭt choh jang sa teh đak ăn tơbăt, tơ̆ hơnăp kơnh tơdrong jang pơtrŭt choh jang sa lơ̆m tơpôl gô hơtŏk loi dơ̆ng pơtho kon pơlei pơgơ̆r jang xa, pơtho khul jang tơ̆ tơring, tơgoăt hơdoi anih mơdro sa hăm hơp tak xah păng kon pơlei choh jang xa; adoi hăm chih akŏm dôm tơdrong tơhlăk tơhlĭn đei ƀôh vă athei hơmet pơ 'lơ̆ng: “Khul jang pơtrŭt choh jang xa tơpôl athei yak hơdai hăm kon pơlei, kơtă hăm kon pơlei. Rŏ lăng athei tơplih ming trong jang, rŏ lăng ‘noh kơtă hloi tơ̆ pơgar sou riêng, mir cheh phe, pơgar chănh hroi, mưh kon pơlei tŏk bŏk choh jang xa, 'noh khul jang năm tơgŭm kon pơlei jang hloi dôm tơdrong chih tơroi lơ̆m kơmăy điên tư păng dôm tơdrong kon pơlei oei bơh ƀơm”.