Dôm năr 'nâu, tơ̆ lơ pơgar sầu riêng tơ̆ xăh Chư Prông, dêh char Gia Lai, kon pơlei athei thuê bơngai kŏh chre hŭt lơ dơng 'long đĭ lôch. Tơ̆ plei Hoàng Yên, lơ pơgar sầu riêng adrol sơ̆ jing 'lơ̆ng, dang ei pă dôm tơnơm 'long kro, hla hơlŭng đĭ đĕch. Đơ̆ng rŏng lơ 'măng chă trong hơmet mă lei ưh gơ̆h, ƀok Trịnh Ngọc Oanh, tơ̆ plei Hoàng Yên athei kŏh hŭt pơđĭ pơgar 'long pơtăm đunh kơ âu 4 sơnăm. Ŭnh hnam ƀok Oanh đei 162 tơnơm sầu riêng, mơ̆t lơ̆m sơnăm mă 4 păng pơtơm vă đei plei mă blŭng. Mă lei, lăp đơ̆ng rŏng mĭnh khei 'năr, 'long jĭ lôch đĭ hloi: “Pơgar hnam nhôn 4 đei sơnăm bơih tam mă phĕ plei, sơnăm 'nâu vă jê̆ đei plei 'noh lôch đĭ. ‘Mêm dêh, bơ̆n kŏng, bơ̆n jên jang lơ̆m noh ngăl. Dang ei athei kŏh hŭt đĕch bơih.”

Ưh lăp hơdrô̆ ŭnh hnam ƀok Oanh đĕch, lơ ŭnh hnam nai tơ̆ plei Hoàng Yên kŭm đei pơgar ‘long lôch thoi noh mơ̆n. Đei ŭnh hnam hiong dôm jĭt tơnơm, đei ŭnh hnam hiong kơ hrĕng tơnơm. Đơ̆ng mĭnh pơgar sầu riêng jing 'lơ̆ng, pơgar ‘long 'nhŏng Lê Văn Thành tơ̆ xăh Chư Prông dang ei lăp pă dôm tŏ tơm ‘long hơngreu hơngrônh hla hơlŭng ruh đĭ. Hla ruh, dơng kro, lơ tơnơm lôch bơih. Ŭnh hnam 'nhŏng Thành kŭm hăm 'nhŏng oh pơtăm vă jê̆ 300 tơnơm sầu riêng, truh dang ei đei dang 6 sơnăm bơih. Sơnăm sơ̆, pơgar phĕ đei dang 17 tân plei, hăm yă tĕch 57.000 hlak 1 kĭ. Mă lei, mơ̆t lơ̆m pơyan phĕ sơnăm 'nâu, ‘long ưh ê đei jĭ păng lôch pơđĭ hloi.

Mă đơ̆ng tam mă băt hơdăh yoa kiơ pơm ăn ‘long lôch, mă lei 'nhŏng Thành tơroi tơ̆ tơm 'long đei lơ anih găm phĕl phônh. Đơ̆ng rŏng kơ 'nŏh, hla kro hơlŭng, ƀlă đơ̆ng noh 'long lôch hloi: “Sơnăm sơ̆ ‘long đei lôch mơ̆n, mă lei lăp tŏ sĕt đĕch, sơnăm 'nâu lôch lơ kơna kon pơlei phă hŭt vă pơtăm ming dơ̆ng. Mih ma duch nă tôch sơ ‘ngon, ưh 'meh lĕch năng tơ̆ pơgar hloi. Kŏng pơtăm, vei rong lơ sơnăm mă dang ei ‘long lôch đĭ, kơ hiôk hloi.”

Ƀok Ngô Anh Tuấn, bơngai jang lơ̆m Anih vei lăng Choh jang xa - atŏk tơiung anih jang xăh Chư̆ Prông, dêh char Gia Lai, tơroi, tơdrong ‘long sâu riêng lôch dang ei mă lơ tơ̆ plei Hoàng Yên păng plei Bạt. Pơgar ‘long lôch đei hơlen tam mă tôm hloh 10 ha. Kiơ̆ đơ̆ng chă hơlen năng blŭng a, anih jang kơpal akhan sâu riêng lôch rŏ năng yoa đơ̆ng pơrang jĭ. Dôm tơdrong đei ƀôh tơ̆ tơm ‘long nhen vă lei lăi hăm pơrang jĭ pơm ăn tiu lôch hrĕnh, lôch hiơ̆. Pơngơ̆t hlŏh dơ̆ng, lơ pơgar ‘long lôch đei tơ̆ dôm tơring teh tơhnă, teh ưh kơ kĕ trep đak. Mưh 'mi đunh năr, đak tơ̆ng lơ̆m pơgar, jing tơdrong 'lơ̆ng vă pơrang jĭ chek lar păng tơpoh.

Ƀok Ngô Anh Tuấn ăn tơbăt: “Lơ pơgar đei ‘long lôch 'noh jĭ dôm pơgar đei teh tơhnă, đak ưh jăh hrơm mât lơ̆m teh. Vă găn pơrang jĭ tơpoh să, tơring krao hơvơn dôm ŭnh hnam đei 'long lôch chre, kŏh hŭt 'long, hơmet pơ ‘ngoăih pơgar; dôm pơgar tam mă đei ‘long lôch 'noh chor hơbong ăn đak lŏk ro, ưh ăn đak lơ̆p 'long."

Dang ei anih jang kơpal xăh Chư Prông, dêh char Gia Lai tŏk bŏk chă hơlen năng teh pơtăm ‘long sầu riêng đei pơrang jĭ phă, pơtho ăn kon pơlei hơmet ming pơgar păng kơchăng pơchoh hŭt đak. Tơdrong ‘long sầu riêng lôch lơ đơ̆ng rŏng đei 'mi đunh ưh lăp pơm hiong răm ăn bơngai pơtăm đĕch, mă oei tơƀôh hơdăh dôm tơdrong krê mưh pơtăm kơloăi 'long 'nâu tơ̆ dôm tơring teh ưh kơ lăp.