Tơ̆ jơ pơma đam, tơdrong tơroi đơ̆ng Hơp tak xăh Choh jang xa Đạ M’ri ăn ƀôh tôch hơdăh dôm tơdrong tơhlăk tơhlĭn tŏk bŏk tơlĕch ăn. Hơp tak xăh dang ei đei 180 'nu bơngai jang, hăm vă jê̆ 450 hek tar sầu riêng. Tơdrong jang xa tih, mă lei đơ̆ng dôm unh hnam oei đei tơdrong pha ra găh trong pơtăm. Bơngai vei lăng 'long kiơ̆ tơdrong hlôh vao đơ̆ng kơdih, bơngai iŏk yoa trong jang ki thuơ̆t; tơdrong iŏk yoa phŏng, pơgang vei lăng 'long pơtăm dăh mă chih răk tơdrong jang kŭm tam mă lai yơ hơtŏ băl.

Ƀok Nguyễn Thanh Sơn, Kơdră Jơnŭm vei lăng pơm hloi Kơdră vei lăng Hơp tak xăh Choh jang sa Đạ M'ri ăn tơbăt: “Tơdrong dang ei đơ̆ng kon pơlei jang chŭn mir ‘noh jĭ  jang xa minh ‘nu 1 trong, ưh kơ đei bu lei lăi bu. Tơdrong tơlĕch ăn tơ̆ ou 'noh pơgơ̆r jang xa thoi yơ. Hơp tak xah nhôn hlôi đei trong jang, pơhrăm, hop akŏm, tơdrong pơlong lăng; tơdrong hơtuch ‘noh pơgơ̆r jang xa kiơ̆ trong rơgoh kơjăp”.

Truh ‘năr 18/9/2026, dêh char Lâm Đồng đei 1.611 kơsô̆ chih tơbăt tơring pơtăm, lơ̆m noh 1.094 kơsô̆ pơyua ăn tĕch tơ̆ teh đak đe hlôi đei teh đak răt tơmơ̆t kĭ ăn; atŭm hăm 547 kơsô̆ hơnih tăh hơmet tơmam. Mă lei, 173 kơsô̆ chih tơbăt tơring pơtăm, hăm hơgăt teh xă hloh 3.600 hek tar, păng 61 kơsô̆ hơnih tăh hơmet tơmam hlôi đei pơdơh jang dăh mă iŏk pơdreo. Dôm kơsô̆ âu ăn ƀôh, mưh pơm hla ar asong kơsô̆ chih tơbăt roi ‘năr roi đei pơm ƀônh, klaih song hơnăp jang păng chih tơmơ̆t lơ̆m kơmăy kơsô̆, tơdrong tơm vei lăng kăl kơ tơplih pran jing tơdrong pơvei hiôk đơ̆ng rŏng kơ asong kơsô̆ chih tơbăt. 'Nŏh jĭ vei lăng tơmam choh jang xa, vei sơđơ̆ng trong pơm tơlĕch, chih răk tôm, tơchă băt tơm a păng hơtŏk ‘lơ̆ng hơnăp jang đơ̆ng rim tơ 'ngla lơ̆m trong jang.

Kơdră Anih pơtrŭt choh jang xa kơ tĕh đak Lê Quốc Thanh pơma hơdăh: “Kơsô̆ chih tơbăt tơring pơtăm tam mă pơma đei tơdrong kiơ ôh, sư 'nao lăp jing tơdrong hiôk đĕch. Oei kon pơlei jang chŭn mir hăm trong jang thoi yơ, tơmam lơ liơ ‘noh đĭ đăng dôm hla ar chih răk đơ̆ng kơsô̆ chih tơbăt 'nŏh mă tơroi đei tơdrong ‘lơ̆ng đơ̆ng tơmam”.

Nơ̆r tơbăt âu ăn ƀôh, kơsô̆ chih tơbăt tơring pơtăm ưh kơgơh lăp lăng băt nhen “vĕ” vă hơnhăk tơmam đơ̆ng choh jang xa đei lĕch tơ̆ anih tĕch mơdro apŭng plĕnh teh. Tơ̆ rŏng rim kơsô̆ chih tơbăt athei jing mĭnh tơring tơmam đei pơgơ̆r pơm tơlĕch 'lơ̆ng, đei trong jang drơ̆ng minh păng gơ̆h vei lăng 'lơ̆ng đơ̆ng blŭng truh tôch. Đơ̆ng tơdrong tơroi tơ̆ Lâm Đồng, ƀai toan tơlĕch ăn, ưh khan lăp hăm sâu riêng đĕch mă hăm lơ kơloăi tơmam đơ̆ng choh jang xa nai kơ Tây Nguyên păng pơđĭ lơ̆m teh đak hai.