Jang kiơ̆ Tơdrong jang tơm Teh đak atŏk tơ iung mŭk drăm-tơpôl tơring kon kông păng groi kông, dôm sơnăm ou ki, tơring Ba Vinh, dêh char Quảng Ngãi hlôi akŏm kon jên tơmơ̆t jang ming man trong nơnăm pơlei pơla, hnam hop akŏm, rim tơdrong ming man pơyoa ăn tơdrong oei sa kơ pơlei pơla păng vei lăng năng tông jơhngơm jăn ăn kon pơlei. Atŭm hăm kon jên đơ̆ng Teh đak, rim tơdrong jang ăn tŏk iŏk jĭ hơyak pran, jĭ hơnih gơnang tơgŭm ăn lơ ŭnh hnam pơ̆n vă atŏk tơ iung choh jang sa. Mă hơdăh nhen unh hnam ƀok Phạm Văn Rôm. Đơ̆ng kon jên tŏk iŏk, ƀok Phạm Văn Rôm hlôi răt pơtăm 4ha ‘long keo, rong nhung, iĕr, gơnơm đơ̆ng noh ŭnh hnam roi năr roi sơđơ̆ng:“Đei Teh đak tơgŭm, hơnih mong jên pơjing rơvơn ăn kon pơlei tŏk iŏk jên jang sa kơna kon pơlei mă đei rơvơ̆n atŏk tơ iung muk drăm unh hnam, roi năr roi kĕ xut xa pơngot rơvĕt dơnuh hin”.

Jăl jang 2026 - 2035, tơring Ba Vinh sơkơ̆t hơdăh tơdrong iung jang kiơ̆ tơdrong đei, vei răk păng atŏk tơ iung rim tơdrong jang joăt joe sơ̆ ki jĭ trong kăl hloh vă pơjing đei tơdrong jang sa đunh đai tai sơnăm ăn kon pơlei. Yă Trần Thị Thanh Thúy, Kơ iĕng Kơdră chĕp pơgơr Hơnih vei lăng kon pơlei tơring Ba Vinh tơbăt: “Tơdrong jang tơm teh đak đei ƀơm truh kon jên bơ̆ jang, ‘noh mă blŭng tơring akŏm tơlĕch jang tơgŭm djru păng iung jang jơnei rim trong tơlĕch jang ou ki mă kon pơlei hlôi jang. Pơtih gia nhen lăm pơtho dui brai vai tanh khăn, ‘nou jĭ dôm tơdrong jang hlôi đei tơgŭm djru ‘noh gô hơnơ̆ng đei lang să păng pơjing đei khul pơm tơlĕch tơmam drăm ăn kon pơlei. Mă lei tơdrong jang ou đei pơjao jên jang ưh kơna tơring ‘meh vă iung jang đĭ đăng rim tơdrong jang tơm vă tơmơ̆t jên jang pơjing đei tơmam drăm ăn kon pơlei.”

5 sơnăm ou ki, kon jên jang đơ̆ng rim Tơdrong jang tơm teh đak, dêh char Quảng Ngãi hlôi tơlĕch jang 26 tơdrong vă jang tơgŭm djru atŏk tơ iung pơm tơlĕch kiơ̆ kăp gĭt păng 399 tơdrong vă jang atŏk tơ iung kon pơlei pơla, tơgŭm ăn kon pơlei roi năr roi sơđơ̆ng jang sa, dă ƀiơ̆ gơnang lơ̆m tơdrong tơgŭm djru. Hơdrô̆ lơ̆m sơnăm 2026, Quảng Ngãi pơjao tơlĕch ăn hloh 1.000 ti hlak jên đơ̆ng Tơdrong jang tơm Teh đak atŏk tơ iung mŭk drăm-tơpôl tơring kon kông păng groi kông sơnăm 2025 tơmơ̆t ăn. Rim tơring tŏk bŏk rơih dôm tơdrong jang trŏ lăp vă atŏk tơ iung jơnei dôm tơdrong mă tơring đei kĕ jang. ‘Noh atŏk tơ iung tơring pơtăm chik atŭm hăm pơm tơlĕch tơ̆ tơring Ba Vì, pơih să rim trong jang pơtăm ‘long plei pơlou, rong kon tơrong tơ̆ Ba Xa păng atŏk tơ iung tơring pơtăm ‘long pơgang tơ̆ Măng Ri.  Ƀok Xiêng Thanh Phúc, Kơdră chĕp pơgơ̆r Hơnih vei lăng Kon kông păng Lui khop dêh char Quảng Ngãi, tơbăt: “Tơdrong jang tơm teh đak jăl jang 2026 – 2030, tơdrong pơgơ̆r iung jang kiơ̆ rim Tơdrong jang tơm teh đak atŏk tơ iung tơring kon kông gô đei tơlĕch jang trŏ lăp hloh hăm tơdrong yan ou. Gô tơlĕch jang rim tơdrong jang mă dôm bơngai kon kông jang sa hơgei lơ̆m dêh char đei jơnei hloh, trŏ lăp hloh păng tơmam drăm đei ƀôh hơdăh hloh, atŭm hăm tơdrong tơgŭm kon pơlei yak hloh dơnuh kơjăp ‘lơ̆ng”

Hăm tơdrong lăng ba đơ̆ng Đảng, Teh đak atŭm hăm tơdrong hơdrin đơ̆ng kơ dih kon pơlei, rim tơdrong jang tơm teh đak gô hơnơ̆ng iung jang jơnei, pơjing đei hơyak pran kơtang ăn atŏk tơ iung mŭk drăm-tơpôl tơring kon kông păng roi kông lơ̆m dêh char Quảng Ngãi lơ̆m jăl jang ‘nao.