Dôm plei sâu riêng tŏk bŏk kăt phĕ lơ̆m pơgar să 3ha 6 sao kơ yă Hồ Thị Huệ, oei lơ̆m thôn 19/5, tơring Krông Pach, dêh char Đắk Lắk. Pơyan ou, ŭnh hnam yă phĕ đei 90 tân sâu riêng. Đi đăng plei đei hơnih mơdro sa kĭ pơkăp răt iŏk hăm kơjă 68.000 hlak jên lơ̆m 1 kĭ. Yă Huệ tơbăt, kơjă ou đei tơchơ̆t hơdăh lơ̆m ‘măng pơgơ̆r tơchă bơngai răt iŏk kơtă lơ̆m mir pơgar hloi.“Nhôn hơpơi akhan dôm ‘măng pơgơ̆r rơih bơngai răt iŏk ou gô hơnơ̆ng atŏk tơ iung vă hơnhăk plei tơmam drăm kơ kon pơlei đei tĕch mơdro tơpăt hơdăh hloh dơ̆ng”.

Atŭm hăm mir pơgar yă Huệ, 9 ŭnh hnam anai tơ̆ Krông Pach, dêh char Đắk lắk đei akŏp hơgăt mir să hloh 14ha, đei rơih vang pơgơ̆r rơih bơngai răt iŏk. ‘Nou jei jing dôm mir pơgar sâu riêng Dona đei hô sơ, mã kơsô̆ tơring pơtăm păng dôm tơdrong tơbăt hơdăh găh trong jang, tơmam drăm tơmơ̆t jang, hơlen băt hơdăh tơm a la chă, rơgoh ‘lơ̆ng tơmam drăm păng dôm tơdrong rơvơn pơvih pơvăn ăn tĕch mơdro tơ̆ teh đak đe.

Mưh tơbăt kơjă, hơnih mơdro sa đei tơgoăt vă năm truh rim mir pơgar dăr lăng hơlen. Đơ̆ng tơlĕch kơjă blŭng a 55.000 hlak jên lơ̆m 1 kĭ, đơ̆ng rŏng ƀar ‘măng tăh hla, kơjă đei rơih bơngai răt iŏk đei băt hơdăh ‘noh 68.000 hlak jên lơ̆m 1 kĭ. Akŏp kơjă kĭ pơkăp răt iŏk vă jê̆ 24 ti hlak jên, lơ hloh kơjă blŭng a dang 4 ti 500 triu hlak jên. Yă Đinh Thị Hoa, Kơdră chĕp pơgơ̆r Kŏng ty tĕch mơdro tơ̆ teh đak đe tơmam drăm choh jang sa Nguyên Thuận tơbăt.“Kŏng ty nhôn hlôi dăr lăng rim mir pơgar păng ƀôh đei ‘noh 10 mir pơgar kơ 10 ŭnh hnam kon pơlei choh jang sa đei ƀôh ‘lơ̆ng păng đei plei lơ ƀlep hăm Công ty ‘meh vă răt iŏk. Păh khul kơdră tơring jei hlôi tơgŭm djru Công ty vă gơ̆h vang pơjei, pơjing rơvơn ăn hơnih mơdro sa păng kon pơlei gơh chă tơmơ̆t jang sa hơdoi”.

Tơdrong kăl hloh ‘măng tơchă rơih bơngai răt măt ưh khan lăp ƀơ̆t kơjă 68.000 hlak jên lơ̆m 1 kĭ, mă oei tơroi tơbăt găh tơring pơtăm đei tơbăt hơdăh lơ̆m jơ ‘năr pơma dơnuh tĕch răt dih băl. Hơnih mơdro sa đei lăng hơlen băt hơdăh hơdrol găh plei, trong jang sa, găh tơdrong ‘lơ̆ng păng sơđơ̆ng ƀlep tơdrong tĕch răt; bơngai pơtăm đei dơ̆ng trong pơm kơnăl  tơdrong kăp gĭt kơ tơmam drăm. ‘Nou jĭ trong pơgơ̆r tôch trŏ lăp lơ̆m tơdrong choh jang sa: tơplih đơ̆ng tĕch mơdro plei jing tĕch mơdro ‘lơ̆ng, yưh liu păng tơdrong gơh hơlen băt trong jang sa. Ƀok Lại Đức Đại, Kơdră chĕp pơgơ̆r Hơnih vei lăng kon pơlei tơring Krông Pach akhan, ‘nou jĭ mĭnh trong jang pơlong năng lơ̆m tơ iung pơjing trong jang tơmam drăm, atŏk kơtang tơgoăt dih băl kơtă ƀar păh kon pơlei choh jang sa păng hơnih tĕch răt.“Kon pơlei gô đei tĕch ưh khan lăp tơmam drăm mă lei tĕch tơdrong kăp gĭt hăm dôm tơmam drăm mă đe sư pơjing đei tơgăl hăm tơdrong đei iŏk yoa sa hơpăh. Nhôn jei hơpơi ‘meh vă tơgoăt dơ̆ng ƀar păh hơnih mơdro sa hăm kon pơlei choh jang sa kơtă, tĕnh koăng hloh, jơnei hloh, hơnhăk ba tơdrong lăp đon ăn rim pang tĕch adoi nhen păh răt iŏk”.

Đơ̆ng tơdrong pơgơ̆r ou, pơgơ̆r tơchă rơih bơngai răt măt rŏ năng gô jing mĭnh trong pơtrŭt mơdro sa, mă kăl ‘noh hăm dôm mir pơgar ‘lơ̆ng, plei tih iĕ lei lăi, hô sơ hơdăh păng trŏ lăp ăn tơdrong ‘meh vă tĕch tơ̆ teh đak đe. Tơdrong kăl hloh dơ̆ng, hăp gô pơjing đei tơdrong đe lăng kơjăp, tơƀôh tơbăt tơmam drăm ‘lơ̆ng, tơgŭm ăn tơdrong tĕch răt ƀôh hơdăh tơring jang sa rơgoh ‘lơ̆ng. Yă Đặng Thị Thủy, Kơ iĕng Kơdră chĕp pơgơ̆r Hơnih vei lăng Choh jang sa păng Cham char dêh char Đắk Lắk hơlen trong jang ou pơjing đei dơ̆ng jơhngơ̆m pran vă kon pơlei choh jang sa lăng kơjăp găh ‘lơ̆ng păng tơgoăt jang hơdoi.“Trong jang tôch hơ iă păng trŏ lăp vă kon pơlei choh jang sa chơt hiôk păng pơjing đei hơyak pran lơ̆m jơhngơ̆m đon tơchĕng, đơ̆ng choh jang sa hmă ‘noh gô tơplih jing jơhngơ̆m đon tơchĕng găh jang mŭk drăm choh jang sa, lăng tơdrong ‘lơ̆ng tơmam drăm ‘noh kăl hloh.”

Mĭnh ‘măng pơgơ̆r tơchă rơih bơngai răt măt tim mă tơplih kĕ trong răt iŏk kơ tơmam drăm. Mă lei tơdăh hơnơ̆ng pơm pơkeh, tơdrong hơlen ‘lơ̆ng, tơmam drăm păng trong jang sa rŏ năng gô jing trong kăl hloh ăn tơdrong jang pơtrŭt mơdro sa đei jơnei, mă kăl ‘noh hăm dôm tơring pơtăm, dôm tơmam drăm ‘lơ̆ng, trŏ lăp ăn tơdrong đe ‘meh vă răt iŏk.