Hơnih tơgŭm jing hơnih mă kon pơlei, hơp tak xah, hơnih jang mŭk drăm păng dôm tơ-'ngla pơm jang gơh kơtă pơma dơnuh, sơng iŏk dôm tơdrong hơgei ki thuơ̆t, kơmăi kơmŏk păng tơplih kơmăi kơsô̆. Tơdrong tơgŭm akŏm lơ̆m dôm tơdrong kăp gĭt gah choh jang xa nhen ki thuơ̆t choh pơtăm, tang găn pơrang hơdrông pơrăm, chih akŏm lơ̆m kơmăi kơsô̆, hơlen băt tơm a la chă, tơroh tơring tĕch răt tơmam drăm.

Ƀok Nguyễn Công Vương, tang măt ăn minh hơnih jang mŭk drăm vang năm akŏm tơdrong pơtơm ăn tơbăt, tơdrong tơmơ̆t hơnih jang mŭk drăm kơmăi kơmŏk 'nao truh tơjê̆ hloh hăm bơngai pơm jang gô pơm trong hiôk vă dôm trong jang 'nao gơh bơ̆ng pang păng iŏk yua trŏ ƀlep hăm tơdrong jang xa:  “Hơnih jang mŭk drăm gô atŭm hăm Hơnih pơtrŭt choh jang xa tơlĕch dôm tơdrong yua kơmăi kơmŏk 'nao lơ̆m choh jang xa. Đơ̆ng dôm tơdrong jang hơdrol đei tơdrong jang hơdai đơ̆ng hơnih jang mŭk drăm păng Hơnih pơtrŭt choh jang xa, pơm jang iŏk yua kơmăi kơmŏk 'nao gô đei pơlan să kơtang păng tơmơ̆t pơm jang tenh kuăng hloh”

Atŭm hăm Hơnih tơgŭm, 4 Khul tơroi tơgŭm ki thuơ̆t păng tĕch răt tơmam choh pơtăm đei pơjing, pơkăp truh pơjing khul jang tơgŭm tơdrong juăt jang, sơng iŏk tơdrong kăl đơ̆ng tơring păng tơroh hăm kon pơlei jang mir, hơp tak xah, hơnih jang mŭk drăm hăm dôm trong jang ki thuơ̆t, kơmăi kơmŏk trŏ ƀlep.

Yă Đặng Thị Thủy, Phŏ Kơdră Hơnih Choh jang xa păng Cham char dêh char Đăk Lăk akhan, tơdrong pơjing Jơnŭm tơgŭm păng dôm Khul tơroi tơgŭm gô pơjing đei minh kênh tơroh 2 pah đơ̆ng hơnih pơtrŭt choh jang xa hăm kon pơlei jang mir; kiơ̆ đơ̆ng noh tom băt tơdrong tơnap tap, tơdrong kăl vă chă tơgŭm. Yă Thủy ră hơdah, tơdrong pơtrŭt choh jang xa dang ei ưh đei pơdơh ah pơtho ki thuơ̆t mă kăl tơguăt hăm kơmăi kơmŏk 'nao, tơring tĕch răt păng pơgơ̆r pơm tơlĕch: “Nhôn tơchơ̆t tơlĕch noh 'meh vă Jơnŭm tơgŭm ou jing minh hơnih juăt jue hăm kon pơlei jang mir, hơnih jang mŭk drăm păng hơp tak xah; tơgŭm kon pơlei jang mir gơh iŏk yua tơdrong hơgei khoa học kỹ thuật, atŭm hăm noh tơroh đei hăm tơring tĕch răt. Ưh hơdrô̆ pơtho gah ki thuơ̆t nhen hơdrol ki, ou gô jing hơnih tơroh 4 hơnih jang, sek tơlang dôm tơdrong tơnap tap đei đơ̆ng tơdrong pơm jang, đơ̆ng noh pơjing đei dôm tơdrong jang pơlan să, pơih să tơdrong tơlĕch jang”