Tơ̆ dêh char Gia Lai, rim tơring tŏk bŏk oei hơtŏk jang tenh tơdrong hơlen, chih akŏm tơdrong kăl păng pơtho ăn kon pơlei keh đang dôm tơdrong pơkăp vă pơjing, asong kơsô̆ pơkăp tơring pơtăm sâu riêng. Hăm lơ kon pơlei jang mir, tơdrong đei kơsô̆ pơkăp tơring pơtăm 'noh tơgŭm pơih trong hiôk ăn tơmam drăm gơh tĕch truh dôm hơnih răt pơkăp kơjăp gah tơdrong 'lơ̆ng păng hơlen hơdah tơm a la chă. Ƀok Hồ Nhất Cẩn, tơ-'ngla kơ minh hơnih pơtăm sâu riêng tơ̆ phương Hoài Nhơn Nam ăn tơbăt, atŭm hăm tơdrong kơchăng gah trong jang hưu kơ, hơtŏk tơdrong 'lơ̆ng hăm plei, ƀok adoi tơrĕk truh tơdrong pơjing tơring pơtăm kiơ̆ trŏ tơchơ̆t: "Yơ̆ng ou ki đei tơdrong Tơchơ̆t 36 'noh inh năm tơ̆ phương. Phương kŭm chă tơgŭm ăn kơ inh gơh đei hơnăn tơmam drăm. Inh kŭm 'meh pơm vă hơnăn tơmam drăm po pơm tơlĕch gơh hơtŏk tơ-iung. Hơpơi 'meh lơ̆m 3 sơnăm dơ̆ng 'noh gơh chă pơjing đei hơnih tĕch răt"

Ƀok Võ Tấn Lực, Kơdră hơnih jang Mŭk drăm, Hnam jang păng Tơring kơdrơ̆m phương Hoài Nhơn Nam, dêh char Gia Lai ăn tơbăt, tơring tŏk bŏk pơtho ăn rim unh hnam jang sâu riêng hơlen lăng, keh đang hô sơ păng tơchơ̆t tơdrong kăl gah tơring pơtăm. 'Nou đei lăng jĭ hơyak mă blŭng vă pơjing dôm tơring pơm jang pơtrŏ hăm tơdrong tơchơ̆t tơlĕch kơ tơring:  "Tơring pơm kiơ̆ tơdrong Tơchơ̆t 36 đơ̆ng Jơnŭm pơgơ̆r teh đak păng gô pơtho ăn rim unh hnam jang pơtăm vă pơm kiơ̆ tơdrong chih măt đei asong năm hŏk, vă pơm kiơ̆ pơkăp pơm jang păng chih akŏm vă gơh đei tôm tơchơ̆t pơjing kơsô̆ pơkăp tơring pơtăm lơ̆m tơring teh kơ phường."

Tơ̆ lơ tơring pơtăm sâu riêng nai kơ dêh char Gia Lai, kon pơlei tŏk bŏk tơrĕk truh tơdrong pơjing kơsô̆ pơkăp tơring pơtăm vă sơđơ̆ng ăn tơdrong tĕch tơlĕch. Unh hnam ƀok Nguyễn Văn Hải tơ̆ xah Ia Ly hlôi tơguăt hăm tơm sâu riêng lơ sơnăm kơ ou. Gơnơm pơm kiơ̆ tơchơ̆t pơm jang, 2 ha sâu riêng kơ unh hnam ƀok lơ̆m lơ sơnăm kơ ou đei bơngai răt bơnê păng đei iŏk yua tôch lơ. Mă lei, tĕch tơmam drăm mă tơm noh oei kiơ̆ trong so đĕch, kơlih pơgar pơtăm tam đei kơsô̆ pơkăp tơring pơtăm. Kiơ̆ kơ ƀok Hải, ah mă tơring tĕch răt roi năr roi kăl  lơ tơchơ̆t, tơdrong pơjing kơsô̆ pơkăp tơring pơtăm gô tơgŭm ăn bơngai jang mir hiôk hian hloh lơm chă tĕch tơlĕch tơmam drăm jang đei lơ̆m khei năr truh: "Unh hnam jang mir nhen inh kŭm nhen lơ bơngai jang sâu riêng bu bu kŭm 'meh hơpơi 'meh gơh đei kơsô̆ pơkăp tơring pơtăm. Vă đơ̆ng rŏng kơnh tĕch tơlĕch ƀônh hiôk păng sơđơ̆ng. Kơlih sâu riêng dang ei, đe tĕch răt roi năr roi lơ. Lơ̆m noh đei tơdrong tĕch răt lang să 'noh ưh đei sơđơ̆ng pơting hăm dôm pơgar mă đei kơsô̆ pơkăp tơring pơtăm”

Truh dang ei, dêh char Gia Lai hlôi đei asong 440 kơsô̆ pơkăp tơring pơtăm hăm lơ hơdrĕch 'long pơtăm, hăm teh pơtăm să hloh 13.000 ha, păng 61 kơsô̆ pơkăp hơnih tah 'nŭng. Hăm sâu riêng, lơ̆m jơ̆p dêh char đei jê̆ 3.000 ha hlôi đei asong kơsô̆ pơkăp tơring pơtăm. Kiơ̆ kơ ƀok Huỳnh Việt Hùng, Kơdră Hơnih Pơtrŭt choh jang xa dêh char Gia Lai, Tơchơ̆t 36 đei dôm tơdrong 'nao vă pơm ƀônh hla bar pơkăp păng pơm trong hiôk hơtŏk tenh tơdrong asong kơsô̆ pơkăp tơring pơtăm ăn kon pơlei: "Kiơ̆ tơdrong tơchơ̆t so 'noh athei pơtăm đơ̆ng 10 ha tŏk tơ̆ kơpal pơtơm gơh đei asong ăn kơsô̆ pơkăp tơring pơtăm. Mă lei, kiơ̆ Tơchơ̆t 36 'noh ưh đei jô̆ truh teh pơtăm să dah ôh. Tơchơ̆t so jĭ minh hơnih teh pơtăm 'noh đei asong ăn minh kơsô̆ pơkăp tơring pơtăm đĕch. Mă lei, lơ̆m tơdrong jang tơpă 'noh lơ̆m minh hơgăt teh kon pơlei ưh đei pơtăm hơdrô̆ minh hơdrĕch 'long pơtăm đĕch ôh, mă pơtăm hrơ hrau atŭm hăm chehphe, 'noh Tơchơ̆t 36 ou pha ƀiơ̆, dang vă akhan lơ̆m minh hơnih teh 'noh đei asong ăn 2 dah mă 3 kơsô̆ pơkăp tơring pơtăm ăn rim hơdrĕch 'long pơtăm tơ̆ teh mă 'noh"

Dêh char Gia Lai tŏk bŏk atŏk kơtang tơlĕch jang Tơdrong tơchơ̆t 36 vă tơbăt ăn kơtơ̆ng ang jang kiơ̆, ƀônh hlôh vao truh hăm kon pơlei, hơp tak xah păng hơnih mơdro sa lơ̆m dêh char găh dôm tơdrong tơchơ̆t ‘nao lơ̆m ƀơk ăn păng vei lăng mã kơsô̆ tơring pơtăm.Lơ̆m ou pơm hiôk tơdrong pơm hla bơar ƀơk ăn, vei lăng mã kơsô̆ tơring pơtăm, mã kơsô̆ hơnih tăh ‘nŭng păng atŏk kơtang trong jang dăr lăng đơ̆ng rŏng. Bơngai chih tơdrong tơroi ou đei pơma dơnuh hăm ƀok Kiều Văn Cang, Kơ iĕng Kơdră Hơnih vei lăng Choh pơtăm păng vei lăng ‘long pơtăm găh Hơnih vei lăng Choh jang sa păng Cham char dêh char Gia Lai găh tơdrong ‘nou.

-  Ƀok ăi, Tơdrong tơchơ̆t 36 sơnăm 2026 đơ̆ng Khul kơdră Teh đak đei dôm tơdrong ‘nao găh năm pơm hla bơar  kơsô̆ pơkăp tơring pơtăm?

Ƀok Kiều Văn Cang: Kiơ̆ tơdrong tơchơ̆t 36/2026 đơ̆ng Khul kơdră Teh đak ‘noh dôm tơdrong ‘nao, Mă blŭng: Gơh sơng iŏk păng ƀơk ăn kơsô̆ pơkăp tơring pơtăm đei pơjao ăn Hơnih vei lăng kon pơlei tơring đei tơring pơtăm. Mă ƀar: Khei ‘năr pơm keh đang hla bơar ƀơk ăn kơsô̆ pơkăp tơring pơtăm đei tơchơ̆t đunh hloh pă 3 năr hăm kơsô̆ pơkăp tơring pơtăm lơ̆m teh đak, păng 10 năr hăm rim teh đak răt iŏk tơmam drăm, jô̆ đơ̆ng rŏng sơng iŏk hla bơar apĭnh ƀơk ăn. Mă pêng: Kơsô̆ pơkăp  tơring pơtăm ‘noh đei ƀơk ăn mĭnh kơ loăi ‘long pơtăm lơ̆m mĭnh pơgar dăh mă lơ mir pơgar, mơ̆ng kiơ̆ rim hơnih jang, bơngai jang, ŭnh hnam dăh mă khul ŭnh hnam. Hơnih groi teh đei sơkơ̆t hơdăh kiơ̆ kơsô̆ pơkăp hơnăn.

-  Kiơ̆ tơdrong tơchơ̆t 'nao, kon pơlei đah mă hơnih jang hơp tak xah 'meh vă chih măt apinh kơsô̆ pơkăp tơring pơtăm 'noh kăl hơmet dôm tơdrong kiơ păng đei pơm jang thoi yơ, hă ƀok?

Ƀok Kiều Văn Cang: Kiơ̆ đơ̆ng tơdrong tơchơ̆t ‘nao, tơdrong ƀơk ăn păng vei lăng mã kơsô̆ tơring pơtăm, truh hloi kơsô̆ pơkăp hơnih tăh tăh ‘nŭng ‘noh đei pơm keh đang kiơ̆ lơ̆m mạng kiơ̆ trong jang hơnih jang, rim bơngai kơdih chih tơbăt păng chiu pŭ tơdrong kơdih pơm. Tơdrong mă ou pơm dă ƀiơ̆ tơhoach jơ ‘năr, kon jên jang, pơm keh đang tĕnh koăng păng hoei đei dơ̆ng dôm tơdrong ou to; pơjing rơvơn ăn rim hơnih jang, rim bơngai sơđơ̆ng tơbăt hơdăh, tơpăt, jơnei păng trŏ lăp hăm tơdrong jang sa. Găh tơdrong pơm hla bơar apĭnh ƀơk ăn kơsô̆ pơkăp tơring pơtăm lei hơnih jang, rim bơngai pơtruh hô sơ athei ƀơk ăn kơsô̆ pơkăp tơring pơtăm ăn Hơnih vei lăng kon pơlei tơring đei hơgăt teh pơtăm ‘long pơtăm ‘noh ( păng truh hloi hơnih tăh ‘nŭng) ‘moi kiơ̆ Cổng dịch vụ bơ̆ jang Teh đak.

Hăm kon pơlei păng rim hơp tak xah ‘meh vă pơm hla bơar apĭnh ƀơk ăn kơsô̆ pơkăp tơring pơtăm ‘noh kăl proh hơmet tôm: Mă blŭng: hơmet ăn hla bơar apĭnh ƀơk ăn kơsô̆ pơkăp  tơring pơtăm, chih tơbăt tôm tong kiơ̆ Tơdrong pơkăp 1 kơ Tơdrong tơhcơ̆t 36. Lơ̆m hla bơar pơm hla bơar ou kăl hơlen mă hơlen păng chih tơmơ̆t tôm tong dôm tơdrong kiơ̆ nơ̆r athei lơ̆m tơdrong pơkăp pơm hla bơar. Mă ƀar: Pơma dơnuh hăm Hơnih vei lăng kon pơlei tơring, phương đei groi teh pơtăm ‘noh.

-  Tơdrong klăh asong, pơjao gơh jang ăn Hơnih vei lăng kon pơlei tơring lơ̆m pơm hla bơar ƀơk ăn, ƀơk ăn dơ̆ng kơsô̆ pơkăp tơring pơtăm gô pơjing rơvơn lơ liơ ăn kon pơlei choh jang sa Gia Lai?

Ƀok Kiều Văn Cang: Tơdrong pơjao gơh ƀơk ăn kơsô̆ pơkăp tơring pơtăm ăn Hơnih vei lăng kon pơlei tơring pơjing đei tôch kơ lơ tơdrong rơvơn: Pơm hla bơar tĕnh koăng, tơjur jơ ‘năr păng kon jên, pơm ‘lơ̆ng hơ iă tơdrong bơ̆ jang pơm hla bơar păng pơjing rơvơn ăn rim hơnih, rim bơngai, sơđơ̆ng tơpăt, hơdăh, jơnei păng trŏ lăp hăm tơdrong jang sa tơ̆ tơring. Tơgŭm ăn kon pơlei oei tơ̆ tơring hơtăih yăih tĕnh koăng đei kơsô̆ pơkăp  tơring pơtăm ‘long pơtăm tĕc mơdro kơtă tơ̆ teh đak đe vă pơm hơtŏk jang sa iŏk yoa kơjă ăn kơ kon pơlei. Pơtrŭt rim hơnih, rim bơngai păng hơp tak xah, khul jang hơdoi tơgoăt dih băl jang sa, pơjing đei rim tơring pơtăm akŏm să vă ƀơk ăn kơsô̆ pơkăp tơring pơtăm.

- Ƀok ăi, vă kơsô̆ pơkăp tơring pơtăm đei vei kơjăp păng hoei iŏk tơvih, kon pơlei, hơp tak xah kăl jang kiơ̆ dôm tơdrong yă kiơ lơ̆m coh jang sa, vei lăng ‘long pơtăm păng hơne băt hơdăh tơm a la chă?

Ƀok Kiều Văn Cang: Kon pơlei kăl kơchăng chih tơbăt mă tôm tong jơ ‘năr jang sa, chih hơdăh năr pơtăm, vei lăng păng phĕ. Vei lăng pơgang: mă kăl ‘noh phŏng păng pơgang vei lăng ‘long pơtăm, lăp iŏk yoa dôm phŏng mơ̆r păng pơgang vei lăng ‘long pơtăm lơ̆m dôm tơmam drăm đei ăn asong iŏk yoa; pơm kiơ̆ kơjăp chă prôi phŏng, pruih pơgang dôm yơ kiơ̆ pơkăp adoi nhen jơ ‘năr pă chă puih, prôi phŏng vă sơđơ̆ng hoei đei tơdrong rơkăh. Pơm kiơ̆ kơjăp hơlen ‘long pơtăm: Kăl dăr lăng păng tang găn hơlou rim pơrang pơrăm tơ̆ rim tơring pơtăm hơmơt đei dơ̆ng tơdrong pơm kơnê̆ găh dôm tơmam đei hơlen hơdăh ‘long pơtăm kơ Việt Nam păng rim teh đak răt iŏk athei. Pơm kiơ̆ kơjăp rim tơdrong tơchơ̆t găh rơgoh ‘lơ̆ng tơmam drăm kiơ̆ tơdrong tơchơ̆t đơ̆ng Việt Nam păng nơ̆r athei đơ̆ng teh đak răt iŏk hăm dôm tơmam drăm tĕch tơlĕch. Pơm kiơ̆ kơjăp tơdrong jang dăr lăng, dăr lăng đơ̆ng rŏng: Hơp tak xah hăm Hơnih vei lăng kon pơlei tơring năm dăr lăng hơnơ̆ng, hơmet pơ ‘lơ̆ng dôm tơdrong pơm glăi kih thuơ̆t đei tơƀôh hơdăh lơ̆m năr dăr lăng, dăr lăngh đơ̆ng rŏng hăm dôm kơsô̆ pơkăp tơring pơtăm. Ưh kơ gơh ăn đe nai mơng, tĕch kơsô̆ pơkăp tơring pơtăm; tơroi tơbăt mă rơhao plei ‘long đei dôm yơ lơ̆m hơgăt teh đei ƀơk ăn kơsô̆ pơkăp  tơring pơtăm vă tơgŭm ăn hơlen băt hơdăh tơm a la chă.

-  lei ah, bơnê kơ ih ƀok hơ.