VOV4.Bahnar - ‘Năr 19/4, jing ‘năr 8/3 âm lịch, lơ̆m tơ drong lêh Đền Hùng sơ năm 2021, tơ̆ Anih gru groa gĭt kăl kơ tĕh đak Đền Hùng (Phú Thọ) pơ gơ̆r thi ‘nŭng, rơ̆ ƀĕng chưng, ƀĕng giầy ‘măng mă VIII. Tơ drong thi sơng đei 13 khul vang akŏm, hăm vă jê̆ 100 ‘nu ngê̆ nhân păng đei lơ tơ moi truh lăng.

Tơ drong thi ‘nŭng, rơ̆ ƀĕng chưng, pĕh pơm ƀĕng giầy ‘măng mă VIII

Đơ̆ng rŏng tĕh hơ gơ̆r pơih blŭng, đe ngê̆ nhân mât lơ̆m tơ drong thi hăm jơ hngâm nŏng tôch ai. Dôm khul thi ‘nŭng 10 tŏ ƀĕng chưng lơ̆m 10 pơ nĭt. Tôch ai 45 pơ nĭt, rim khul athei rơ̆ sĭn, tŭl pơ hĕch 5 kĭ phe tơ yông vă pơm 10 tŏ ƀĕng giầy. Tơ drong thi ‘nŭng, rơ̆ ƀĕng chưng, pơm ƀĕng giầy ‘nŏh jĭ tơ drong juăt tôch hơ iă đơ̆ng sơ̆ kơ hơ drĕch hơ drung, tơ ƀôh hơ dăh jơ hngâm đon nhă đak ƀlŏk kơ tu.

‘Nâu kŭm jing jơ năr vă đe ngê̆ nhân, kon pơ lei dôm hơ drĕch hơ drung lơ̆m păng ‘ngoăih kơ dêh char ngôi pơ chơt, hŏk pơ hrăm dôm tơ drong kăl vă vei lăng tơ drong juăt ‘lơ̆ng hơ iă đơ̆ng sơ̆ kơ hơ drĕch hơ drung Việt. Khul iŏk đei yaih như̆k ‘nŭng, rơ̆ ƀĕng chưng păng yaih như̆k thi pĕh pơm ƀĕng giầy sơ năm ‘nâu gô đei Dơ nŏ anih vei lăng kon pơ lei dêh char iŏk năm pơm ƀĕng chưng, ƀĕng giầy vă pơ yơ̆r ăn đe Ƀok Pơ tao Hùng ƀlep ƀât năr et soi kơ Ƀok pơ tao Hùng sơ năm 2022.

Dơ̆ng: Tơ blơ̆