VOV4.Bahnar - ‘Năr brei (26/10), dêh char Lâm Đồng đei 6 ‘nu jĭ Covid-19 ‘nao. Lơ̆m noh, đei 4 ‘nu ‘noh tơ poh jĭ ‘nao đei chă ƀôh tơ̆ tơ pôl tơ̆ anih kơ drơ̆m pơ lei tơm Đà Lạt. Pơ tôch dăr hơ len blŭng a, anih jang kơ pal dêh char Lâm Đồng băt hơ dăh tơ drong tơ poh đơ̆ng anih jĭ 4 ‘nu tă kơ đei ƀôh đơ̆ng bơ ngai oei tơ̆ pơ lei tơm Hồ Chí Minh năm tơ̆ Đà Lạt păng thuê hnam hô tel ƀĭch pơ dơh.

Anih vei lăng găh jang pơ gang dêh char Lâm Đồng hlôi tơ tĕnh tơ lĕch hla tơ roi tơ băt kơ sô̆ 71 vă tơ chă bơ ngai đei măt tơ̆ hloh 10 hơ nih hơ mơt đei ƀơm truh, lơ̆m noh đei dôm hơ nih ăn đe ƀĭch pơ dơh, kơ chơ, hơ nih tĕch tơ mam sa, huch chĕh phe, tra sưa, hơ nih tĕch pơ gang păng hơ nih tĕch tơ mam. Kŭm hăm hơ nih jĭ ‘nao âu, dêh char Lâm Đồng tŏk bŏk dăr hơ len, tơ chă, răp hơ len lăng 19 anih tơ poh jĭ Covid-19 nai. Dang ei Lâm Đồng đei akŏp đĭ đăng kơ sô̆ 490 ‘nu jĭ Covid-19, lơ̆m noh đei 313 ‘nu hlôi đei hơ met klăih păng lĕch brŏk đơ̆ng hnam pơ gang.

Thuem: Tơ blơ̆