VOV4.Bahnar - Năr 27/10, dêh char Lâm Đồng hơnơ̆ng ƀô̆h dơ̆ng 15 ‘nu bơngai tơpŏh jĭ Covid-19, lơ̆m au đei lơ bơngai jĭ ƀơm trŭh hơnĭh đei jĭ ‘nao lơ̆m pơlei tơm Đà Lạt. Lơ̆m 15 ‘nu bơngai jĭ Covid-19 au, đei 7 ‘nu bơngai jĭ oei tơ̆ pơlei tơm Đà Lạt, 6 ‘nu bơngai tơ̆ Đức Trọng păng 2 ‘nu bơngai tơ̆ apŭng Bảo Lâm.

Hơdrô̆ dôm bơngai ‘nao tơpŏh ji tơ̆ pơlei tơm Đà Lạt jei đei ƀơm trŭh tơ̆ hơnĭh jĭ ‘nao lơ̆m koeng 31 trong Nguyễn Công Trứ, phương 8, Pơlei tơm Đà Lạt. Dang ei bơ̆ jang vat tơring, khăm tơchă, năm tơchă dôm bơngai oei tơ jê̆, ăn oei hơdrô̆ dôm bơngai đei tơ ƀơ̆p oei tơjê̆ hăm rim bơngai jĭ tŏk bŏk đei rim khŭl jang kơ dêh char Lâm Đồng iung jang kơtang. Trŭh dang ei, Lâm Đồng hlôi đei 505 ‘nu bơngai jĭ Covid-19, lơ̆m au 323 ‘nu bơngai hlôi ming hơmet klăih păng ăn brŏk vĭh tơ̆ hnam.

Tơblơ̆ nơ̆r: Amazưt