VOV4.Bahnar - Đơ̆ng rŏng 28 năr hơ met jĭ COVID- 19 tơ̆ Hnam pơ gang Lao păng tơ sŏh dêh char Dak Lak, pơ gê 8/6, 2 ‘nu bơ ngai jĭ COVID -19 kơ sô̆ 3237 păng 3334 hlôi lĕch brŏk đơ̆ng hnam pơ gang đơ̆ng rŏng 3 ‘măng set hơ len ưh pă đei pơ rang jĭ SARS-CoV2.

Ƀar ‘nu bơ ngai jĭ lĕch brŏk đơ̆ng hnam pơ gang

Ƀar ‘nu bơ ngai jĭ âu oei tơ̆ trong iĕ 189/1, trong Mai Hắc Đế, phường Tân Thành, plt Buôn Ma Thuột. Đơ̆ng rŏng 28 năr hơ met, jơ hngâm pran 2 ‘nu bơ ngai jĭ âu sơ đơ̆ng ‘lơ̆ng păng 3 ‘măng set hơ len jĭ ƀôh ưh pă đei pơ rang jĭ SARS-CoV-2 bơih.

Đơ̆ng rŏng kơ brŏk đơ̆ng hnam pơ gang, 2 ‘nu bơ ngai âu oei đei vei lăng jơ hngâm pran hơ nơ̆ng tơ̆ anih oei xa đơ̆ng rŏng kơ hơ met jĭ Covid-19 kiơ̆ tơ drong hơ găt đơ̆ng Anih tơm vei lăng jang pơ gang. Thoi nŏh, jô truh ‘năr 8/6, dêh char Dak Lak oei đei 2 ‘nu bơ ngai jĭ Covid-19 oei hơ met tơ̆ anih oei hơ drô̆ păng tơ̆ Hnam pơ gang jĭ Lao păng tơ sŏh.

Dơ̆ng: Tơ blơ̆