VOV4.Bahnar - Ƀok Trịnh Quang Trí, Kơ dră Anih vei lăng tơ drong jĭ jăn dêh char Dak Lak tơ băt, 56 ‘nu F1 đơ̆ng bơ ngai jĭ 15921 tơ̆ Dak Lak hlôi đei pơ tôch hơ len lăng ‘măng mă 1 ư̆h kơ đei ƀôh yŏng jĭ SARS-CoV-2. Bơ ngai jĭ 15921 đei ƀôh tơ̆ dêh char Dak Lak lơ̆m ‘năr 28-6, đơ̆ng pơ lei tơm Hồ Chí Minh brŏk tơ̆ Dak Lak. Ƀơm truh bơ ngai jĭ âu, blŭng a, anih jang pơ gang hlôi jang hơ dai hăm  khŭl kơ dră tơ ring tơ chă, băt hơ dăh đei 56 ‘nu ngôi tơ jê̆ hăm  (F1), ‘noh; 28 ‘nu bơ ngai lơ̆m ŭnh hnam, kơ tŭm kơ tŏng, rông ƀôt; 4 ‘nu kang ƀô̆ jang pơ gang; 20 ‘nu tơ moi hao hơ dai lơ̆m gre đơ̆ng pơ lei tơm Hồ Chí Minh brŏk tơ̆ Dak Lak; 4 ‘nu oei hơ dai pôm hnam tơ̆ xăh Vĩnh Lộc A, apŭng Bình Chánh, pơ lei tơm Hồ Chí Minh. Truh jơ ‘năr dang ei, đĭ đăng 56 ‘nu ‘nao tơ roi adoi hlôi đei ăn oei hơ drô̆ akŏm păng iŏk pham hơ len lăng SARS-CoV-2 ‘măng mă 1 ư̆h kơ đei ƀôh yŏng jĭ.

Thuem: Tơ blơ̆