VOV4.Bahnar - ‘Năr 16/11, ƀak si Trần Thuận – Kơ dră vei lăng anih jang pơ gang apŭng Krông Búk, dêh char Dak Lak tơ băt lơ̆m tơ ring ‘nao đei 6 ‘nu kang ƀô̆ tŏk bŏk bơ̆ jang tơ̆ Anih vei lăng kon pơ lei apŭng Krông Búk đei pơ tôch test hrĕnh kháng nguyên đei ƀôh jĭ SARS-CoV-2, lơ̆m noh đei 5 ‘nu tŏk bŏk bơ̆ jang tơ̆ Anih vei lăng tơ mam drăm păng Cham char apŭng Krông Búk đei jĭ SARS-CoV-2. Lăp iŏk đei kơ tơ̆ng ang, Anih jang pơ gang apŭng Krông Búk hlôi tơ chă, iŏk đak muh hơ len lăng ăn kơ dôm bơ ngai ƀơm truh.

Vă vei sơ đơ̆ng tơ drong jang tang găn jĭ hơ buh, khŭl jang kơ pal hlôi pơ vang găn 1 anih bơ̆ jang kơ Anih vei lăng kon pơ lei apŭng Krông Búk ƀơm truh dôm bơ ngai đei jĭ SARS-CoV-2. Dôm bơ ngai F1 đei ăn oei hơ drô̆ kiơ̆ tơ drong hơ găt. Jô̆ truh ‘năr dơ̆ng ‘năr 16-11, lơ̆m dêh char Dak Lak đei 6.154 ‘nu jĭ Covid -19, lơ̆m noh đei 3.493 ‘nu hlôi hơ met klăih păng brŏk đơ̆ng hnam pơ gang.

Thuem: Tơ blơ̆