VOV4.Bahnar - Kơ sơ̆ 4/5, Anih pơ gơ̆r jang tang găn jĭ COVID-19 apŭng Cư M’gar, dêh char Dak Lak đei hla ar gơih ăn dôm anih jang đei ƀơm truh roi tơ băt găh 1 ‘nu bơ ngai nhen đei jĭ COVID-19. Kiơ̆ hla ar chih, dang 13h kơ sơ̆ 4/5, Hnam pơ gang thĭ trơ̆n Ea Pốk, apŭng Cư M’gar sơng 1 ‘nu bơ ngai truh tơ roi găh jơ hngâm jăn yoa ‘nao brŏk đơ̆ng plt Đà Nẵng. Bơ ngai âu nhen thoi đei jĭ Covid-19 nhen hiĕn, yuh, lĕch đak muh…

Đơ̆ng rŏng iŏk đei nơ̆r tơ roi, bơ ngai âu hlôi đei ăn oei hơ drô̆, iŏk pham gơih ăn Anih tang găn pơ rang jĭ Tây Nguyên vă set hơ len păng oei gô hla ar set hơ len. Dang ei bơ ngai âu đei ăn oei hơ drô̆ tơ̆ Anih hơ met jĭ tơ pŏh kơ Hnam pơ gang apŭng Cư M'gar. Lăp iŏk đei nơ̆r tơ roi găh bơ ngai đei jaua tơ pŏh jĭ, dôm khul jang kơ pal pơ gơ̆r pruih pơ gang pơ lôch pơ rang jĭ tơ̆ Hnam pơ gang thĭ trơ̆n Ea Pốk, hnam tep pơ dơ̆h Tứ Quý, hnam gre Toàn Thông păng ăn oei hơ drô̆ tơ̆ hnam hăm dôm bơ ngai tơ ƀâp, ngôi hơ dai hăm bơ ngai jâu jĭ kơ pal.

Dơ̆ng: Tơ blơ̆