VOV4.Bahnar - Truh khei ‘năr âu, ‘năr 4/5 bơ ngai jĭ COVID -19 tơ̆ ‘măng đei ƀôh mă 4 tơ̆ Dak Lak hlôi ƀrŏk đơ̆ng hnam pơ gang. Kăl kơ lăng truh, lơ̆m kơ sô̆ 4 ‘nu jĭ âu, đei bơ ngai jĭ COVID -19 mă 3836 đei ƀôh jĭ ăl măh dui jơ hngơ̆m hăm kơ măy păng răih tăh đing tơ̆ dăng hơ lăng. Tơ drong klăih kơ jĭ đơ̆ng bơ ngai jĭ âu hlôi hơ nhăk ăn tơ drong pơ lung tôch kơ tih ăn đe thây pơ gang lơ̆m tơ drong jang tang găn jĭ COVD-19.

Chĕp hla ar lĕch đơ̆ng hnam pơ gang đơ̆ng rŏng 41 năr hơ met jĭ COVID-19, ‘nhŏng V.Đ.D, rơ neh sơ năm 1971, oei tơ̆ phường Đạt Hiếu, thị xã Buôn Hồ, dêh char Dak Lak pă kĕ ôn tơ drong chơt păng hơ nơ̆ng pơ ma nơ̆r bơ nê truh khŭl ƀak si hlôi hơ met, vei lăng ăn kơ sư prăt khei ‘năr âu ki. ‘Nhŏng D. tơ băt: Ƀơ̆t băt kơ kơ dih đei jĭ COVID -19 sư tôch kơ bơ ngơ̆t, tơ tăm hloh dơ̆ng ƀơ̆t jĭ đei ƀôh roi ăl. 1 giĕng đei vei lăng hăm lơ tơ mam kơ măy kơ mŏk pơ gang tăh lơ̆m hơ kâu, đei jơ ‘năr ƀĕnh hơ kâu jĭ, dui jơ hngơ̆m tôch mơ mat pơm ăn kơ sư măh tăr văr hloi. Mă lei, đei tơ drong pơ lung vei lăng tơ tom đơ̆ng khŭl ƀak si, sư hlôi yak hloh đơ̆ng ‘măng lôch vă brŏk hăm ŭnh hnam păng tơ pôl:

 “Ƀơ̆t dui jơ hngơ̆m hăm kơ măy đei jĭ ăl ‘noh jĭ jơ hngơ̆m đon tôch kơ bơ ngơ̆t, kŭm ƀôh hli. Ƀơ̆t dui jơ hngơ̆m tôch kơ hrơ hrăh, mă lei hơ nơ̆ng đei đe ƀak si pơ lung tơ gŭm hơ drin yak hloh ‘măng jĭ krê hơ mơt ‘noh. ‘Ngoăih kơ tơ drong jang pơ gang ‘noh rim năr bơ ngơ̆t por chao, ƀim, đak toh tôch kơ ‘lơ̆ng. Apĭnh bơ nê kơ đĭ đăng y ƀak si hlôi hơ met ăn kơ ĭnh lơ̆m khei ‘năr âu ki.”

‘Nhŏng D jing bơ ngai jĭ COVID -19 mă 3836 lơ̆m ‘năr 15/5/2021. Sư ‘noh jĭ F1 đơ̆ng bơ ngai jĭ 3052 tơ̆ Thuận Thành, Bắc Ninh. Yua đơ̆ng tơ poh pơ rang jĭ tơ plih COVID-19 đơ̆ng Ấn Độ kơ na jơ hngơ̆m jăn sư đei dôm tơ drong jĭ ƀôh pha hloi. Ƀak si Châu Đương, Kơ dră vei lăng Hnam pơ gang hơ met jĭ hiĕn hiang păng jĭ tơ soh dêh char Dak Lak tơ băt; Vă hơ met ăn bơ ngai jĭ 3836 Hnam pơ gang hlôi măh gơ nang truh tơ drong tơ gŭm đơ̆ng khŭl ƀak si truh đơ̆ng Hnam pơ gang tơ ring Tây Nguyên păng hnam pơ gang Chợ Rẫy pơ lei tơm Hồ Chí Minh kŭm hăm lơ tơ mam kơ măy kơ mŏk hơ drô̆. Hơ dai hăm ‘noh, rim năr, Hnam pơ gang kŭm chih tơ roi đĭ đăng kơ sô̆ đơ̆ng bơ ngai jĭ ăn Khŭl vei lăng hơ met COVID-19 teh đak vă hơ len lăng.

Bơ ngai jĭ COVID -19 mă 3836 lơ̆m năr jĭ ăl

Tơ drong tơ gŭm đơ̆ng khŭl y ƀak si hlôi hơ nhăk ăn iŏk yua ‘lơ̆ng, truh ‘năr 17/6 bơ ngai jĭ 3836 hlôi ăn ƀôh ư̆h kơ đei yŏng jĭ SARS –CoV-2 blŭng a. Truh ‘năr 25/6 đơ̆ng rŏng 3 ‘măng hơ len lăng ư̆h kơ đei ƀôh jĭ tơ til, bơ ngai jĭ hlôi đei brŏk đơ̆ng hnam pơ gang. Tơ roi găh tơ drong hơ met ăn bơ ngai jĭ 3836 ƀak si Châu Đương tơ băt:

“Bơ ngai jĭ âu ‘noh jĭ 1 lơ̆m dôm bơ ngai jĭ kơ gĭt kăl, bơ ngai jĭ ƀĭch tơ̆ hnam pơ gang ‘năr 14/5, 3 năr đơ̆ng rŏng đei bôh jĭ tôch kơ hrĕnh, bơ ngai jĭ roi dêh păng tôch kơ hơ mơt, ‘noh Hnam pơ gang hlôi đei khŭl hơ met kơ Hnam pơ gang tơ ring năm ăn dui jơ hngơ̆m hăm kơ măy păng hlŏng pham hơ nơ̆ng. Truh ‘năr 24 khŭl hơ met đơ̆ng hnam pơ gang Chợ Rẫy năm tơ gŭm dơ̆ng. Đơ̆ng rŏng 7 năr hơ met ‘noh bơ ngai jĭ đei ƀôh ‘net ƀiơ̆, đei pơ dơh kơ hlŏng pham, ĕnh dui jơ hngơ̆m hăm kơ măy păng đơ̆ng rŏng ‘noh toh kơ măy dui jơ hngơ̆m. Bơ ngai jĭ âu ƀôh tôch kơ hrĕnh, tôch kơ ăl mă lei prăih tôch kơ hrĕnh.”

Bơ gai jĭ COVID -19 mă 3836 asong pơ kao bơ nê kơ đe ƀak si hlôi đĭ jơ hngơ̆m hơ met, vei lăng ăn kơ sư lơ̆m prăt 41 năr

Ƀok Nguyễn Văn Hùng, Phŏ Kơ dră Anih vei lăng jang pơ gang dêh char Dak Lak tơ băt, iŏk đơ̆ng jĭ COVID -19 đei ƀôh truh dang ei, Dak Lak hlôi yak hloh 2 ‘măng hơ met ăn bơ ngai jĭ COVID-19 hăm 8 ‘nu jĭ. Mă lei tơ drong ƀôh jĭ ăl nhen bơ ngai jĭ 3836 ‘noh jĭ bơ ngai mă blŭng anih jang pơ gang Dak Lak athei tơ jră. Lơ̆m tơ drong tơ mam, kơ măy kơ mŏk oei kơ ƀăh kơ ƀôch, khŭl ƀak si tam mă đei băt lơ, tơ drong hơ met jơ nei ăn bơ ngai jĭ 3836 ‘noh tơ drong chơt hơ iă đơ̆ng khŭl thây pơ gang hơ met tơ̆ Hnam pơ gang hơ met jĭ hiĕn hiang păng jĭ tơ soh păng kŭm jing tơ drong hiôk vă kơ đe ƀak si kơ dêh char gơh hơ met, hŏk tơ mơ̆t ming tơ drong hlôh vao hơ met jĭ:

“Hăm hơ met jơ nei bơ ngai jĭ âu ‘noh sư pơm ăn ‘nhŏng oh jang pơ gang đei tôch kơ lơ tơ drong hlôh vao. Mă tơ pă ‘noh tơ roi găh joăt jang hơ met ming ‘lơ̆ng ‘noh hŏk 3 sơ năm, mă lei vih ư̆h kơ tơ ƀơ̆p bơ ngai jĭ âu, ư̆h kơ jang ‘noh ư̆h gơ̆h băt. Kơ dih dôm ‘nhŏng oh jang hơ gei đunh đai kơ khoa hồi cức âu ‘noh đe sư kŭm đei hlôh vao hŏk pơ hrăm. Pơ tih gia nhen ƀơ̆t 1 kơ sô̆ tơ plih lơ̆m kơ măy hơ len lăng bơ ngai jĭ ‘noh đe sư băt hơ tŏk kơ liêu, tơ jur kơ liêu mă lăp. ‘Nâu jĭ tơ drong hlôh vao tôch kơ kăp gĭt.”

Truh dang ei, Dak Lak hlôi hơ met klăih 7/8 ‘nu bơ ngai jĭ covid hloh 2 ‘măng jĭ. Dôm kơ toh đak pơ uh đơ̆ng khŭl y ƀak si kơ toh truh dang ei adoi đei ‘mong plơ̆ tơ găl hăm jơ nei hơ nhăk ăn tơ drong arih ăn bơ ngai jĭ.

Nam Trang: Chih

Thuem: Tơ blơ̆