VOV4.Bahnar - Kiơ̆ kơtơ̆ng ang đơ̆ng Dơnŏ anĭh chĕp pơgơ̆r tang găn jĭ Covid-19 kơ dêh char Dak Lăk, bơngai đei ƀô̆h tơpŏh sơmach jĭ tơ̆ dêh char au ‘nŏh ‘nhŏng T.V.X (rơnĕh sơnăm 1976 oei lơ̆m Thôn 5, tơring Cư Mốt, apŭng Ea H’Leo, Đăk Lăk). ‘Nhŏng T.V.X ‘nŏh bơngai chă jang ăn kơ đe tơ̆ kơchơ Bình Điền (pơlei tơm HCM) ‘nao brŏk tơ̆ pơlei. Năr 4/7, ‘nhŏng T.V.X hao gre chơ tơmoi brŏk tơ̆ Dak Lăk, lơ̆m hao gre ‘nhŏng T.V.X đei gom ƀŏ păng ư̆h kơ đei pơma dơnŭh hăm bơngai bu lơ̆m gre. Pơgê năr 5/7, lăp đơ̆ng rŏng jur đơ̆ng gre tơ̆ km92 QL14, ‘nhŏng T.V.X hao gre bơbĭt năm tơ̆ Hnam pơgang tơring Cư Môt tơroi tơbăt akau jăn, păng brŏk oei lơ̆m pơk mir oei tơ̆ thôn 5, tơring Cư Mốt oei kơ dĭh lơ̆m hnam păng ư̆h kơ đei tơ ƀơ̆p bơngai bu. Trŭh năr 6/7 ‘nhŏng T.V.X chĕp pơ grŭn, drĕh sĕh, hơdrap hlôi năm tơ̆ hnam Pơgang tơring păng đei tơroi tơbăt ăn năm tơ̆ Hnam pơgang apŭng Ea H’Leo khăm. Hlŏh đơ̆ng khăm tĕnh koăng ‘nŏh đei ƀô̆h sơmach jĭ SARS-CoV-2. Lăp đơ̆ng rŏng ‘nŏh, iŏk pham khăm hơlen kiơ̆ trong khăm RT – PCR đei ƀô̆h tơpŏh sơmach jĭ SARS-CoV-2.

Tơblơ̆ nơ̆r: Amazưt