VOV4.Bahnar - Kơsơ̆ năr 26-5, ƀok Nay Phi La, Kơdră chĕp pơgơ̆r Dơnŏ anĭh vei lăng jang pơgang dêh char Dak Lăk tơbăt, bơngai jĭ covid-19 kơsô̆ 3836 tŏk bŏk ming hơmet tơ Hnam pơgang Hơmet Hiĕn hiang păng Jĭ Tơsŏh hlôi đei jơhngơ̆m sơđơ̆ng ƀiơ̆ bơih.

Dak Lăk hlôi ăn dơ̆ng 3 kmăi dui jơhngơ̆m tơgŭm ăn Hnam pơgang Hơmet Hiĕn hiang păng Jĭ Tơsŏh

Bơngai jĭ hlôi pơdơ̆h hlŏng rơgŏh pham, ăn huch tŏ sĕt ƀiơ̆ pơgang jĭ. Năr au, 27/5, bơngai jĭ au rŏ năng ăn dui jơhngơ̆m hăm kmăi hui đơ̆h păng lơ̆m 2 năr kơnh pă đei ăn dui jơhngơ̆m hăm kmăi bơih. Bơngai jĭ Covid-19 kơsô̆ 3836 đei Dơnŏ anĭh tơm vei lăng jang pơgang tơbăt hơdăh lơ̆m năr 15/5/2021. Đơ̆ng rŏng 8 năr ming hơmet tơ̆ Hnam pơgang Hơmet Hiĕn hiang păng Jĭ Tơsŏh dêh char Dak Lăk, bơngai jĭ roi jĭ ăl. Bơngai jĭ măh dui jơhngơ̆m hăm kmăi, hơnơ̆ng ƀet pơgang. Tơ̆ hơnăp đei tơdrong jĭ ăl au, hơnĭh jang pơgang Dak Lăk hlôi hơvơn kmăi kmŏk păng 3 khŭl jang tơplĭh, ƀok thây pơgang đơ̆ng Hnam pơgang tơm tơring Tây Nguyên năm tơ̆ Hnam pơgang Hơmet Hiĕn hiang păng Jĭ Tơsŏh vă vang ming hơmet ăn.

Tơblơ̆ nơ̆r: Amazưt