VOV4.Bahnar - ‘Nao lăp mât lơ̆m năr mă 3 pơ dơ̆h jang kiơ̆ tơ drong tơ chơ̆t 16, mât lơ̆m năr jang kiơ̆ tơ drong Tơ chơ̆t 15, ‘năr 17/8, plt Buôn Ma Thuột đei ƀôh lơ bơ ngai jĭ COVID -19 lơ̆m tơ pôl hăm 7 ‘nu bơ ngai jĭ tam mă băt tơ pŏh đơ̆ng yơ. Bơ ngai mă blŭng lơ̆m dôm ‘nu bơ ngai jĭ âu ‘nŏh ƀok T.Q.S., rơ nĕh sơ năm 1968, oei tơ̆ kơ sô̆ 174 Thủ Khoa Huân, phường Thành nhất, plt Buôn Ma Thuột.

Test hrĕnh tơ drong jĭ ăn kon pơ lei jŭm dăr anih ‘nao đei jĭ

Kiơ̆ đơ̆ng hơ len năng, đơ̆ng ‘năr 01-8 truh 15-8, ƀok S. đei năm tơ̆ lơ anih nhen: hnam ‘nhŏng ŏh tơ̆ plei Kŏ Đung, xăh Ea Nuôl, apŭng Buôn Đôn, anih tĕch đak xăng tơ̆ trong Nguyễn Thị Định, phường Thành Nhất, trong iĕ 139 Thủ Khoa Huân. Dang ei khul kơ dră tơ ring păng anih jang pơ gang oei hơ nơ̆ng pơih xă tơ ring vă dăr hơ len, tơ chă dôm bơ ngai ƀơm truh 6 ‘nu bơ ngai ‘nao tơ roi kơ pal. Tơ drong yak vih vât, tơ ƀâp, pơ ma nuh hăm bơ ngai F0 ‘nao đei mă lơ ‘nŏh tơ̆ anih lơ̆m plt oei pơ vang găn ngăl, rim bơ ngai ưh gơ̆h lĕch đơ̆ng hnam mưh ưh đei tơ drong kăl.

Dơ̆ng: Tơ blơ̆