VOV4.Bahnar - Kơ sơ̆ ‘năr 4/11, kiơ̆ tơ roi tơ băt đơ̆ng Anih jang pơ gang apŭng Krông Năng, dêh char Dak Lak lơ̆m apŭng ‘nao đei dơ̆ng 63 ‘nu test hrĕnh đei ƀôh pơ rang jĭ SARS-CoV-2 tơ̆ plei Wik, plei Đê păng plei Giêr, xăh Ea Hồ. Hơ drol ‘noh, lơ̆m pơ gê ‘năr 3/11, đơ̆ng rŏng chă ƀôh 2 ‘nu hŏk tro lơ̆m xăh Ea Hồ đei jĭ SARS-CoV-2 lơ̆m ‘năr 1/11, khŭl jang kơ pal hlôi pơ gơ̆r dăr hơ len tơ chă dôm bơ ngai ngôi tơ jê̆ hăm 2 ‘nu oh hŏk tro âu ‘noh hơ nơ̆ng chă ƀôh 3 ‘nu lơ̆m unh hnam 2 ‘nu hŏk tro jĭ SARS –CoV -2.

Pơ̆ih să tơ chă dôm bơ ngai ngôi tơ jê̆ hăm bơ ngai jĭ ‘nao tơ roi, Anih jang pơ gang apŭng Krông Năng chă ƀôh vă đĭ đăng dôm bơ ngai jĭ tă kơ đei ƀơm truh 1 hơ nih hơ pong đe lôch tơ̆ xăh Ea Hồ lơ̆m ‘năr 29/10. Dang ei tơ drong jang tơ chă, iŏk đak muh hơ len lăng kon pơ lei lơ̆m 3 pơ lei hơ nơ̆ng đei tơ tĕnh tơ lĕch jang.

Thuem: Tơ blơ̆