VOV4.Bahnar -  ‘Năr 12/10 tơ̆ xăh Dur Kmăl, apŭng Krông Ana, dêh char Dak Lak hlôi đei 1 hơ nih bơ ngai jĭ Covid-19 lơ̆m tơ pôl tam mă băt hơ dăh tơ poh đơ̆ng yơ. Hơ drol ‘noh, ‘năr 11/10 yă N.T.A năm tơ̆ Hnam pơ gang xăh Dur Kmăl khăm jĭ păng đei pơm hơ len lăng test hrĕnh kháng nguyên COVID-19, đei ƀôh jĭ SARS –CoV -2. Năr đơ̆ng rŏng ƀơ̆t đei ƀôh test hrĕnh đơ̆ng yă N.T.A, Hnam pơ gang apŭng Krông Ana hlôi tơ chă păng iŏk đak muh hơ len lăng dôm bơ ngai đei ƀơm truh păng đei dơ̆ng 14 ‘nu đei hơ len lăng ƀôh jĭ SARS-CoV-2.

Bơ ngai jang pơ gang iŏk đak muh test hrĕnh ăn kon pơ lei plei Dur I

‘Năr dơ̆ng, ‘năr 12-10, 15 kơ mâu test hrĕnh tă ăn ƀôh Realtime RT- PCR đei jĭ SARS –CoV -2.  Anih jang pơ gang apŭng Krông Ana hlôi pơ gơ̆r test hrĕnh ăn kơ dang 1.000 ‘nu kon pơ lei kơ plei Dur I, xăh Dur Kmăl, khŭl kơ dră tơ ring kŭm pơ vang găn kon pơ lei tơ̆ đội 3, plei Dur 1, xăh Dur Kmăl păng pơm 4 hơ nih răp găn vă vei lăng kon pơ lei păng gre mơ̆t lĕch lơ̆m tơ ring jĭ.

Thuem: Tơ blơ̆