VOV4.Bahnar - Anih vei lăng jŏh ayŏ kơ dŏ xoang, tơ plŏng kơ dâu păng chă tơ mang lăng dêh char Dak Lak pơ gơ̆r hơ ri pơm tông roi tơ băt păng hơ len năng tơ drong Hơ ‘mon Đon hơ pơi ‘mĕh Dam Săn – tơ drong jŏh hơ ri đei chĕh pơ chĕh ‘moi kiơ̆ tơ drong Hơ ‘mon Dam Săn kơ bơ ngai Rađe, hăm đon hơ mĕng pơ jing đei 1 tơ drong joh hơ ri tih lơ̆m tơ drong jŏh hơ ri Việt Nam. 

Bơ ngai pơ chĕh ƀai hơ ri Nguyễn Cường tơ roi găh tơ drong pơ gơ̆r pơm tông hơ ri

Pơm tông jŏh hơ ri Đon hơ pơi ‘mĕh Dam Săn ‘nŏh jĭ tơ drong jang đei dêh char Dak Lak kĭ kiơ̆ nơ̆r athei đơ̆ng công ty TNHH Sông Thương Garden, pơ jao ăn Anih vei lăng jŏh ayŏ kơ dŏ xoang, tơ plŏng kơ dâu păng chă tơ mang lăng dêh char pơ gơ̆r, Bơ ngai pơ chĕh ƀai hơ ri Nguyễn Cường chih hơ met păng pơ gơ̆r pơm, Khul hơ ri hơ xoang kon kông dêh char Dak Lak hơ ri hơ xoang.

Yă H Yim Kđoh, Phŏ Kơ dră vei lăng kon pơ lei dêh char Dak Lak ăn tơ băt, Tơ drong pơ gơ̆r jŏh hơ ri pơm tông Đon hơ pơi ‘mĕh Dam Săn đei dêh char kĭ vă pơ jing 1 tơ drong hơ ri hơ xoang tih lơ̆m tơ drong joh hơ ri Việt Nam. Tơ iung, chĕp vei păng tơ ƀôh dơ̆ng tơ drong juăt, jŏh ayŏ kơ dŏ xoang ‘lơ̆ng hơ iă kơ bơ ngai Rađe kiơ̆ đơ̆ng dôm boa hơ ri, tơ drong hơ xoang đei yoa lơ̆m tơ drong pơm tông hơ ri; pơ jing tơ drong jŏh ayŏ tôch hơ iă, đei ư hơ nhang kơ Dak Lak, đei pơ gơ̆r rim sơ năm.

Dơ̆ng: Tơ blơ̆