VOV4.Bahnar - ‘Năr brei (19/8), Dak Lak đei kơ sô̆ bơ ngai jĭ Covid-19 lơ hloh đơ̆ng jĭ đei ƀôh tơ̆ dêh char. Lơ̆m kơ sô̆ 56 ‘nu đei chih iŏk, đei truh 47 ‘nu lơ̆m 1 hơ nih tơ poh jĭ lơ̆m tơ pôl. Kiơ̆ kơ anih vei lăng găh pơ gang, hơ nih tơ poh jĭ lơ̆m tơ pôl ‘nao hloh kơ dêh char, đei ƀôh tơ̆ plei Kwăng A, xăh Cư Bao, thị xã Buôn Hồ. Jô̆ truh drơ̆m kơ sơ̆ brei, kơ sô̆ bơ ngai jĭ Covid-19 lơ̆m hơ nih tơ poh jĭ âu đĭ jing 46 F0. Ƀok Nay Phi La, Kơ dră Anih vei lăng jang pơ gang Dak Lak akhan, pơ rang jĭ tơ̆ hơ nih tơ poh jĭ âu ‘noh tam mă băt rơ đăh. Vă sơ kơ̆t hơ dăh kơ jăp, kăl đei dơ̆ng kơ tơ̆ng ang găh dôm bơ ngai huơ̆r gre tih hlôi truh tơ̆ mir đak lar Cư Bao.

Jô̆ đơ̆ng blŭng khei 7 truh dang ei, hlôi đei 6 apŭng, thị xăh, pơ lei tơm tơ̆ dêh char đei ƀôh dôm hơ nih tơ poh jĭ đơ̆ng 10 ‘nu tơ̆ kơ pal. Lơ̆m noh, pơ lei tơm Buôn Ma Thuột đei 2 hơ nih tơ poh, akŏp đĭ đăng 30 ‘nu jĭ. Thị xã Buôn Hồ păng dôm apŭng: Cư Kuin, Krông Bông, Krông Pak, M’Đrak, rim tơ ring đei 1 hơ nih tơ poh, akŏp đĭ đăng 155 ‘nu. Gơ nang đơ̆ng tơ tom gơ var tơ ring, tơ chă, hơ len lăng, lơ kơ sô̆ dôm hơ nih tơ poh jĭ tơ̆ Dak Lak hlôi đei găn kĕ đơ̆ng rŏng 14 năr pơ vang găn.

Thuem: Tơ blơ̆