VOV4.Bahnar - Kơ tơ̆ng ang đơ̆ng Anih pơ gơ̆r jang tang găn jĭ COVID-19 dêh char Dak Lak, ‘năr 22-7, lơ̆m dêh char đei dơ̆ng 10 ‘nu jĭ SARS-CoV-2, hơ tŏk đĭ đăng kơ sô̆ bơ ngai jĭ lơ̆m dêh char tŏk 47 ‘nu. Lơ̆m kơ sô̆ 10 ‘nu jĭ ‘nao đei 4 ‘nu tơ̆ xăh Ea Bung, apŭng Ea Súp, ‘noh F1 đơ̆ng hơ nih bơ ngai jĭ tơ̆ tơ ring âu; 1 ‘nu tơ̆ pơ lei tơm Buôn Ma Thuột, ‘noh F1 bơ ngai jĭ N.T.H oei tơ̆ hnam gre Tiến Oanh; 3 ‘nu oei tơ̆ xăh Ea Ktur, apŭng Cư Kuin, ‘noh F1 kơ hơ nih bơ ngai jĭ đei chih iŏk hơ drol ‘noh.

‘Ngoăih kơ ‘noh, tơ̆ apŭng Buôn Đôn kŭm đei 1 ‘nu ‘noh T.N.B.T, rơ neh sơ năm: 2012, oei tơ̆ thôn 2, xăh Cuôr Knia, apŭng Buôn Đôn, đei pơ rang jĭ brŏk đơ̆ng dêh char Bình Dương. Tơ̆ apŭng Krông Búk kŭm đei bơ ngai mă blŭng jĭ SARS-CoV-2. Bơ ngai jĭ âu ‘noh V.T.P.K, rơ neh sơ năm 1992, plei AĐrơng Điết, xăh Cư Pơng, ‘noh kon pơ lei đei pơ rang jĭ brŏk đơ̆ng Bình Dương. Thoi noh, truh kơ sơ̆ ‘năr 22-7, lơ̆m dêh char Dak Lak hlôi đei 11/15 apŭng, thị xã, pơ lei tơm đei dôm bơ ngai jĭ SARS-CoV-2.

Thuem: Tơ blơ̆