VOV4.Bahnar - Ngày 11/8, dêh char Dak Lăk đei dơ̆ng 18 ‘nu tơpŏh jĭ Covid-19 atŏk măt bơngai tơpŏh jĭ lơ̆m dêh char trŭh 464 ‘nu bơngai. Lơ̆m 18 ‘nu bơngai tơpŏh jĭ Covid-19 tơ̆ dêh char Dak Lăk au, Apŭng Krông Bông đei bơngai tơpŏh lơ hlŏh ‘nŏh 7 ‘nu, kiơ̆ đơ̆ng rŏng ‘nŏh apŭng Krông Pach đei 5 ‘nu.

Đĭ đăng bơngai ‘nao tơpŏh jei tơpŏh đơ̆ng dôm bơngai jĭ đei ƀô̆h hơdrol kơ ‘nŏh. Jĭ hơbŭh Covid-19 tơ̆ Dak Lăk tŏk bŏk tơpŏh kơtang tơ̆ rim tơring atăih yăih, bơ̆ jang tang găn jĭ oei tim gan tơnăp, jang kiơ̆ ăn oei hơtăih dĭh băl tim gan kơtang, rim bơngai brŏk đơ̆ng tơring đei jĭ pơm kiơ̆ ăn oei hơdrô̆ tim mă gan ƀlep hăm tơdrong tơchơ̆t. Jei lơ̆m năr 11/8, 24 ‘nu bơngai jĭ Covid-19 tơ̆ Dak Lăk hlôi ăn brŏk đơ̆ng hnam pơgang, atŏk măt bơngai hơmet klăih păng ăn brŏk tơ̆ tơring trŭh 54 ‘nu bơngai. Lơ lŏh, dêh char Dak lăk trŭh dang ei pă 409 ‘nu bơngai tŏk bŏk ming hơmet, lơ̆m akŏp kơsô̆ 464 ‘nu bơngai tơpŏh jĭ Covid-19.

Tơblơ nơ̆r: Amazưt