VOV4.Bahnar - Kiơ̆ Anih pơ gơ̆r jang tang găn jĭ COVID -19 dêh char Dak Lak, lơ̆m ‘năr 8/8, lơ̆m dêh char đei dơ̆ng 20 ‘nu bơ ngai tơ pŏh pơ rang jĭ SARS-CoV-2 tơ̆ 6 apŭng păng plt. Lơ̆m kơ sô̆ 20 ‘nu bơ ngai jĭ lơ̆m ‘năr 8/8, đei 14 ‘nu bơ ngai tơ pŏh lơ̆m tơ pôl, lơ̆m nŏh đei 3 ‘nu bơ ngai tơ̆ apŭng M’Drak tam mă băt tơ pŏh đơ̆ng yơ, đei Hnam pơ gang apŭng chă ƀôh kiơ̆ đơ̆ng set hơ len jĭ rim khei.

Khoa hơ met jĭ lơ̆m hơ kâu jăn, hơ met jĭ ăn hơ iŏh păng jĭ tơ pŏh kơ Hnam pơ gang apŭng M’Drak đei pơ vang găn vă tang găn jĭ COVID -19

Ƀơm truh dôm bơ ngai jĭ ‘nao đei âu, lơ̆m gơ măng (7/8) Hnam pơ gang apŭng M’Drak hlôi athei pơ vang hnam khu B3 (đei Khoa Hơ met jĭ ăl păng Khoa hơ met jĭ lơ̆m hơ kâu jăn, hơ met jĭ ăn hơ iŏh păng jĭ tơ pŏh). Đĭ đăng kăn ƀô̆ jang pơ gang, bơ ngai jĭ, bơ ngai lơ̆m unh hnam bơ ngai jĭ đei ăn oei hơ drô̆ păng iŏk pham set hơ len hrĕnh jĭ COVID -19. Jô̆ truh 17h, ‘năr 8/8, dêh char Dak Lak đei 391 ‘nu bơ ngai tơ pŏh pơ rang jĭ SARS –CoV -2, lơ̆m nŏh oei hơ met jĭ ăn 376 ‘nu, 14 ‘nu bơ ngai klăih jĭ bơih păng 01 ‘nu bơ ngai lôch.

Dơ̆ng: Tơ blơ̆