VOV4.Bahnar - Tơdrong kơtơ̆ng ang đơ̆ng Dơnŏ anĭh chep pơgơ̆r tang găn jĭ Covid-19 dêh char Dak Lăk, lơ̆m năr 2/8, lơ̆m dêh char đei dơ̆ng 25 ‘nu bơngai tơpŏh sơmach jĭ SARS- CoV-2.

18 lơ̆m 25 ‘nu jĭ Covid-19 tơ̆ Dak Lăk đei ƀô̆h lơ̆m năr ‘nŏh đei tơpŏh đơ̆ng bơngai jĭ brŏk đơ̆ng pơlei tơm Hồ Chí Minh păng dêh char Bình Dương. 6 ‘nu bơngai jĭ đei ƀô̆h lơ̆m rim hơnĭh ăn oei hơdrô̆. ‘Nau dôm bơngai F1 kơ rim bơngai jĭ hlôi đei ƀô̆h hơdrol kơ ‘nŏh tơ̆ apŭng Buôn Đôn, thĭ xăh Buôn Hô păng pơlei tơm Buôn Ma Thuột. Atŭm lơ̆m năr, Dak Lăk đei ƀô̆h dơ̆ng 1 ‘nu bơngai jĭ oei tơ̆ koeng 3, thôn 12, tơring Ea Kmut, apŭng Ea Kar, ‘nŏh bơngai vơ̆r gre chơ tơmam drăm kơ Kŏng ty gre chơ tơmam drăm Bưu chính viễn thông Con đường xanh. Bơngai mă au ư̆h kơ băt sư tơpŏh đơ̆ng yơ păng đei chă yak năm tơ̆ lơ tơring đei tơdrong jĭ nhen Ninh Thuận, Bình Thuận, Phan Thiết, pơlei tơm Hồ Chí Minh, Đà Nẵng, Gia Lai. Lơ lŏh, jô̆ trŭh 5 jơ kơsơ̆ năr 2/8, dêh char Dak Lăk hlôi đei 265 ‘nu bơngai tơpŏh jĭ SARS -CoV-2, lơ̆m au tŏk bŏk ming hơmet 258 ‘nu bơngai, 7 ‘nu bơngai hơmet klăih păng ư̆h kơ đei bơngai lôch ră.

Tơblơ̆ nơ̆r: Amazưt