VOV4.Bahnar - Lơ̆m năr 15/10, lơ̆m dêh char Dak Lăk hlôi đei dơ̆ng 68 ‘nu bơngai jĭ Covid-19. Lơ̆m au, mă kăl 7 ‘nu bơngai đei tơpŏh lơ̆m kon pơlei tơ̆ pơlei tơm Buôn Ma Thuột. Lơ̆m 7 ‘nu bơngai au, đei 4 ‘nu bơngai lơ̆m 1 ŭnh hnam tơ̆ tơring Ea Tam, 2 ‘nu bơngai tơ̆ phương Tân Thành păng 1 ‘nu tơ̆ phương Thành Nhất. 

Pơvang tang găn dôm hơnĭh rim bơngai jĭ erĭh sa păng bơ̆ jang vă tang găn jĭ

Lăp đơ̆ng rŏng băt đei rim bơngai jĭ, hơnĭh jang pơgang pơlei tơm hlôi iung jang hơdoi hăm rim khŭl dăr lăng, tơchă dôm bơngai oei tơjê̆ păng pơgơ̆r pơvang tang găn hơnĭh dôm bơngai tơpŏh jĭ erĭh sa păng dôm hơnĭh mă đe hăp trŭh. Adoi pơgơ̆r hloi khăm Test rĕnh hăm dôm bơngai đei ƀơm trŭh. Đei hlŏh 200 ‘nu bơngai hlôi đei khăm hơlen jei ư̆h kơ đei ƀô̆h tơpŏh sơmach jĭ ră.

Tơblơ̆ nơ̆r: Amazưt