VOV4.Bahnar - Kơ tơ̆ng ang đơ̆ng Anih pơ gơ̆r jang tang găn jĭ COVID-19 dêh char Dak Lak, truh ‘năr dơ̆ng ‘năr 20/7, tơ ring hlôi đei dơ̆ng 8 ‘nu jĭ COVID-19. Kiơ̆ kơ ‘noh, 8 ‘nu jĭ ‘nao âu đei 3 ‘nu tơ̆ pơ lei tơm Buôn Ma Thuột, 2 ‘nu tơ̆ apŭng Cư Kuin, 1 ‘nu apŭng Ea H’leo, 1 ‘nu apŭng Ea Súp păng 1 ‘nu thị xã Buôn Hồ.

Lơ̆m kơ sô̆ 3 ‘nu ‘nao đei chă ƀôh tơ̆ Buôn Ma Thuột, kăl kơ lăng truh ‘noh jĭ N.V.T đei anih oei sa tơ̆ thôn Hiệp Lợi, xăh Quảng Hiệp, apŭng Cư M’gar, jĭ bơ ngai pơ jao tơ mam kơ anih jang Viettel tơ̆ kơ sô̆ 132 trong Hai Bà Trưng, pơ lei tơm Buôn Ma Thuột. Bơ ngai âu hlôi năm truh kơ hrĕng hơ nih, tơ ƀơ̆p hăm lơ bơ ngai lơ̆m tơ ring. Truh dang ei anih jang kơ pal hlôi tơ chă đei 33 ‘nu F1 păng 23 ‘nu F2 ƀơm truh dôm bơ ngai âu păng tơ drong tơ chă tŏk bŏk đei hơ nơ̆ng tơ lĕch jang.

Thuem: Tơ blơ̆