VOV4.Bahnar - Kiơ̆ tơ roi tơ băt đơ̆ng Anih vei lăng tơ drong jĭ jăn dêh char Dak Lak, tơ̆ thị xã Buôn Hồ ‘nao đei 8 ‘nu jĭ SARS –CoV -2, lơ̆m noh đei hơ nih bơ ngai jĭ hăm 7 ‘nu jĭ. Lơ̆m kơ sô̆ 8 ‘nu ‘nao chă ƀôh dang ei đei 6 ‘nu tă kơ oei tơ̆ 15 Âu Cơ, phường Đoàn Kết păng 1 ‘nu oei tơ̆ 110 Nguyễn Tất Thành, Phường An Bình. Dôm bơ ngai âu đei tơ poh jĭ đơ̆ng 1 ‘nu jĭ oei atŭm tơ̆ Phường An Bình. Bơ ngai jĭ uơ oei dơ̆ng ‘noh bơ ngai huơ̆r gre tih, oei tơ̆ phường Thiện An, tam mă băt hơ dăh hơ nih tơ poh.

Mĭnh hơ nih pơ vang găn tơ̆ thị xã Buôn Hồ ƀơm truh hơ nih đei lơ bơ ngai jĭ

Kiơ̆ dăr hơ len pơ rang jĭ, lơ̆m 8 ‘nu jĭ, đei 1 ‘nu bơ ngai jĭ đei chă năm truh tơ̆ dôm hơ nih lơ bơ ngai nhen kơ chơ thị xã Buôn Hồ, anih mong jên. Hơ drô̆ bơ ngai jĭ ‘noh bơ ngai huơ̆r gre năm pơ jao tơ mam tơ̆ lơ hơ nih tơ̆ thị xã Buôn Hồ, klĕch lơ dêh char nhen Khánh Hòa, Bình Phước, Gia Lai.

Thuem: Tơ blơ̆